அரசியல் ஒத்துழைப்பு எப்போதும் சமரசத்துடன் வருகிறது: நிக் நாஸ்மி

அரசியல் ஒத்துழைப்பு எப்போதும் சமரசத்துடன் வருகிறது; அது அரசியல் விஷயங்களில் மட்டுமல்ல, கொள்கை அளவிலும் நிகழ்ந்து, இறுதியில் ஒரு கட்சியின் நெறிகளையே பாதிக்கக்கூடும் என்று பெர்சாமா (Bersama) தலைவர் நிக் நாஸ்மி நிக் அஹ்மட் கூறினார்.

Threads தளத்தில் வெளியிட்ட பதிவில், பல மலேசியர்கள் தொடக்கத்திலிருந்தே அரசியல் மீது நம்பிக்கையிழந்து இருப்பதற்கு இதுவும் ஒரு காரணம் என்று முன்னாள் PKR துணைத் தலைவர் தெரிவித்தார்.

"இதுதான் ஏராளமான மலேசியர்கள் ஆரம்பத்திலிருந்தே அரசியல் மீது வெறுப்புணர்வு கொள்வதற்கான காரணங்களில் ஒன்று," என்றார் (மொழிபெயர்ப்பு).

தேர்தலில் இடங்களை வெல்வதற்கான வாய்ப்பை அதிகரிக்க, அதிக செல்வாக்குள்ள கட்சிகளுடன் Bersama ஒத்துழைக்க வேண்டும் எனும் ஆலோசனையைத் தொடர்ந்து இந்தக் கருத்து வெளியானது.

அரசியல் ஆய்வாளரும் FMT பத்தி எழுத்தாளரும் ஆகிய தாஜுடின் ராஸ்டி நேற்று தெரிவித்த கருத்துக்கு நிக் நாஸ்மி பதிலளித்தார். ஆகஸ்ட் 1ஆம் தேதி நடந்த நெகிரி செம்பிலான் மாநிலத் தேர்தலில் பார்ட்டி வாவாசான் நெகாரா (Wawasan) பெற்ற வெற்றியை Bersama பாடமாகக் கொள்ள வேண்டும் என்று அவர் கூறியிருந்தார். புதிய கட்சிகள் வலுவான, செல்வாக்குள்ள கட்சிகளுடன் இணைய வேண்டும் என்பது தாஜுடினின் கருத்து.

அந்த மாநிலத் தேர்தலில், பெரிக்காத்தான் நேசனல் (PN) சின்னத்தில் போட்டியிட்ட Wawasan, தான் போட்டியிட்ட நான்கு இடங்களில் மூன்றை வென்றது.

Bersama-வுக்கு எந்தக் கட்சியை கூட்டாளியாக தாஜுடின் கருதுகிறார் என்று நிக் நாஸ்மி வினவினார்.

"பெர்சத்துவுடனா? அது நெகிரி செம்பிலானில் பெற்ற வாக்குகள், ஜொகூரில் Bersama பெற்றதைவிட சற்றே அதிகம். அல்லது புதிய BN-PN கூட்டணியுடனா? அது தற்போது நலன் சார்ந்த திருமணம் போல் தோன்றுகிறது; தன் உள்முரண்பாடுகளால் சரியவும் கூடும்," என்றார் (மொழிபெயர்ப்பு).

வாக்குறுதி அளித்த பல நிறுவன மற்றும் பொருளாதார சீர்திருத்தங்களைச் செயல்படுத்துவதில் பாக்காத்தான் ஹரப்பான் (PH) "மிகவும் தாமதமாக" இருந்ததாகவும் அவர் கூறினார்.

அரசியலின் முதன்மை நோக்கம் மாநில சட்டமன்ற உறுப்பினர், நாடாளுமன்ற உறுப்பினர் அல்லது அமைச்சர் ஆவது மட்டுமே எனில், தானும் மற்றொரு பெர்சாமா தலைவர் ரபீஸி ராம்லியும் ஏற்கெனவே அந்தப் பதவிகளை அடைந்துவிட்டோம் என்றார்.

மேலும் ஒரு பதவிக்காக அல்ல, சீர்திருத்தத்திற்குப் போராடி மாற்று வழியை வழங்கவே Bersama-வை நிறுவினோம் என்று அவர் கூறினார்.

"இறுதியில், எந்தவொரு அரசியல் கட்சியும் தேட வேண்டிய மிகச் செல்வாக்குள்ள கூட்டாளி மற்றொரு கட்சி அல்ல, மலேசிய மக்களே," என்றார் (மொழிபெயர்ப்பு).