வாழ்க்கைச் செலவு நெருக்கடி: பிரிட்டனில் எரிபொருள் திருட்டு அதிகரிப்பு

லண்டன் – வாழ்க்கைச் செலவு நெருக்கடி காரணமாக ஐக்கிய இராச்சியத்தில் (UK) எரிபொருள் நிலையங்களில் திருட்டுச் சம்பவங்கள் அதிகரித்து வருகின்றன.

தொழில்நுட்ப மற்றும் தரவு பகுப்பாய்வு நிறுவனமான Forecourt Eye நடத்திய ஆய்வில், பிப்ரவரி முதல் ஜூலை வரை திருடப்பட்ட எரிபொருளின் மதிப்பு 48 விழுக்காடு உயர்ந்துள்ளது தெரியவந்துள்ளது. நாடு முழுவதும் உள்ள 8,359 எரிபொருள் நிலையங்களில் நாள் ஒன்றுக்கு சராசரியாக £194,000 (ரிம1.06 மில்லியன்) மதிப்பிலான எரிபொருள் திருடப்படுவதாக மதிப்பிடப்பட்டுள்ளது.

ஈரான் போர் தொடங்கிய பின்னர் கடந்த ஐந்து மாதங்களில், பணம் செலுத்தாமல் எரிபொருள் நிரப்பிச் செல்லும் வாகனங்களின் எண்ணிக்கை, அதற்கு முந்தைய ஐந்து மாதங்களுடன் ஒப்பிடும்போது 20 விழுக்காடு அதிகரித்துள்ளது.

தொழிலாளர் கட்சியைச் சேர்ந்த பிரதமர் ஆண்டி பர்ன்ஹாம் நிர்வாகத்தின் புதிய ஆற்றல் செயலாளர் மியாட்டா ஃபான்புல்லே, இந்தப் பிரச்னையை வாழ்க்கைச் செலவு நெருக்கடியுடன் தொடர்புபடுத்தினார்.

செவ்வாய்க்கிழமை இதுகுறித்து கேள்விகளுக்கு உள்ளான அவர், ஆற்றல் நிறுவனங்களின் விலை உயர்வே இதற்கு ஒரு காரணம் என்பதைச் சுட்டிக்காட்டினார். இதற்கு Reform UK கட்சியின் துணைத் தலைவர் ரிச்சர்ட் டைஸ் கண்டனம் தெரிவித்து, குற்றங்களை தொழிலாளர் கட்சி மென்மையாகக் கையாள்வதாகக் குற்றம்சாட்டினார்.

"இந்தப் பிரச்னை குறித்து நாங்கள் நன்கு அறிவோம். உள்துறை அமைச்சுடன் இணைந்து இதில் பணியாற்றி வருகிறோம்; இறுதியில் குற்ற வழக்குகளையும் திருட்டு வழக்குகளையும் அவர்களே கையாள்வார்கள்," என்றார்.

"ஆனால், ஆற்றல் மற்றும் எரிபொருள் செலவுகளால் மக்கள் கடும் நெருக்கடியில் இருக்கிறார்கள் என்பதையே இது காட்டுகிறது.

"எரிபொருள் விலைகளை நாங்கள் கண்காணித்து வருகிறோம். தற்போதைய எரிபொருள் விலை மிக அதிகம் என்பதையும், மக்கள் அது குறித்து மிகவும் கவலைப்படுகிறார்கள் என்பதையும் புரிந்துகொள்கிறோம்," என்று LBC வானொலி நிகழ்ச்சியில் தொகுப்பாளர் நிக் ஃபெராரியின் கேள்விக்கு அவர் பதிலளித்தார். – ஏஜென்சி