ஆசியான் கூட்டாக பிராந்திய தாக்குப்பிடிப்புத் திறனை வலுப்படுத்த வேண்டும்: காலிட்

பெட்டாலிங் ஜெயா – நாளுக்கு நாள் சவால் நிறைந்த புவிசார் அரசியல் சூழலில், நெருக்கமான ஒத்துழைப்பின் மூலம் ஆசியான் கூட்டாகப் பிராந்திய தாக்குப்பிடிப்புத் திறனை வலுப்படுத்த வேண்டும்.

வியட்நாமுக்கான இரண்டு நாள் அரசுமுறைப் பயணத்தின்போது அந்நாட்டுப் பிரதமர் லெ மின் ஹங்குடன் நடத்திய சந்திப்பில் விவாதிக்கப்பட்ட விடயங்களில் இதுவும் ஒன்று என பாதுகாப்பு அமைச்சர் டத்தோ ஸ்ரீ முகமட் காலிட் நோர்டின் கூறினார்.

தற்போதைய சிக்கலான பாதுகாப்பு சவால்கள் குறித்தும் இருதரப்பும் கருத்துப் பரிமாற்றம் செய்ததாக அவர் தெரிவித்தார்.

"வல்லரசுகளின் போட்டி, சாம்பல் நிற வலயச் செயல்பாடுகள், சைபர் அச்சுறுத்தல்கள், செயற்கை நுண்ணறிவு (AI), அறிவாற்றல் போர் மற்றும் விநியோகச் சங்கிலி இடையூறுகள் ஆகியவை விவாதிக்கப்பட்ட விடயங்களில் அடங்கும்," என்று அவர் இன்று முகநூல் பதிவில் கூறினார். (மலாய் மொழியிலிருந்து மொழிபெயர்க்கப்பட்டது.)

முதல் அரசுமுறைப் பயணம்

பாதுகாப்பு அமைச்சராக முகமட் காலிட் வியட்நாமுக்கு மேற்கொள்ளும் முதல் அரசுமுறைப் பயணம் இதுவாகும். வியட்நாம் துணைப் பிரதமரும் தேசியப் பாதுகாப்பு அமைச்சருமான ஜெனரல் பான் வான் ஜியாங்கையும் அவர் சந்திக்க உள்ளார்.

2023ஆம் ஆண்டு கையெழுத்திடப்பட்ட பாதுகாப்பு ஒத்துழைப்புப் புரிந்துணர்வு ஒப்பந்தம் (MoU), மலேசியா–வியட்நாம் பாதுகாப்பு உறவை மேலும் மூலோபாய நிலைக்கு உயர்த்தும் வழிகாட்டித் திட்டமாக தொடர்ந்து இருக்கும் என்று அவர் கூறினார்.

கடல்சார், திறன் மேம்பாடு, தொழில்நுட்பம் மற்றும் பாதுகாப்புத் தொழில்துறையில் ஒத்துழைப்பை விரிவுபடுத்தும் முயற்சிகளும் சந்திப்பில் விவாதிக்கப்பட்டன.

"இது பிராந்தியத்தின் அமைதி, ஸ்திரத்தன்மை மற்றும் செழிப்பை வலுப்படுத்தும் இரு நாடுகளின் உறுதிப்பாட்டுக்கு இணங்குகிறது," என்றார்.