உலகின் 8 பெரும் எண்ணெய் நிறுவனங்கள்: நிமிடத்திற்கு RM2.8 மில்லியன் லாபம்

துபாய் – ஈரானைச் சுற்றிய மோதல் எரிசக்தி விலைகளை உயர்த்தியதைத் தொடர்ந்து, உலகின் மிகப்பெரிய எட்டு எண்ணெய் நிறுவனங்கள் இந்த ஆண்டின் இரண்டாம் காலாண்டில் ஒரு நிமிடத்திற்கு 700,000 அமெரிக்க டொலர் (RM2.8 மில்லியன்) மேல் லாபம் ஈட்டியுள்ளன.

அராம்கோ, BP, ஷெல், Equinor, டோட்டல்எனர்ஜிஸ், Eni, செவ்ரான் மற்றும் எக்ஸான்மொபில் ஆகிய நிறுவனங்கள் மூன்று மாதங்களில் மொத்தமாக ஏறக்குறைய 93 பில்லியன் டொலர் (RM380 பில்லியன்) லாபம் பெற்றுள்ளன என தரவுகள் காட்டுகின்றன. இது சென்ற ஆண்டின் இதே காலத்தை விட கிட்டத்தட்ட இரு மடங்கு.

அமெரிக்கா-இஸ்ரேல் ஈரானுக்கு எதிராக நடத்திய போரால் புதைபடிவ எரிபொருள் விநியோகம் பாதிக்கப்பட்டு, உலகச் சந்தையில் எண்ணெய் விலை ஒரு பீப்பாய்க்கு 126 டொலர் (RM515) கடந்த நிலையில் இந்த லாபம் ஈட்டப்பட்டது.

அராம்கோவுக்கு அதிக லாபம்

அராம்கோ மிக அதிக லாபத்தைப் பதிவு செய்தது; அதன் காலாண்டு நிகர வருவாய் 34 விழுக்காடு உயர்ந்து 33 பில்லியன் டொலரை (RM135 பில்லியன்) தாண்டியது. ஈரான் மற்றும் ஹூத்தி படைகளின் ட்ரோன், ஏவுகணைத் தாக்குதல்களால் அதன் உள்கட்டமைப்பு சேதமடைந்த போதிலும் இந்த உயர்வு பதிவாகியது.

அதே காலத்தில், இந்த எட்டு நிறுவனங்களின் சந்தை மதிப்பு சுமார் 600 பில்லியன் டொலர் (RM2.4 ட்ரில்லியன்) உயர்ந்து 3 ட்ரில்லியன் டொலரை (RM12 ட்ரில்லியன்) தாண்டியது. புதைபடிவ எரிபொருள் எரிப்புடன் தொடர்புடையதாகக் கருதப்படும் தீவிர வெப்ப அலைகளை உலகம் எதிர்கொண்டு வரும் வேளையில் இது நிகழ்ந்தது.

செயற்பாட்டாளர்களின் விமர்சனம்

எரிசக்தி விலை உயர்வு செயற்பாட்டாளர்களின் விமர்சனத்தைத் தூண்டியுள்ளது. மில்லியன் கணக்கான வீட்டுக்குடும்பங்கள் அதிக கட்டணங்களைச் சுமக்க வேண்டியிருக்கும் அதே வேளையில், எண்ணெய் நிறுவனங்கள் சந்தைக் குழப்பத்தில் பெரும் லாபம் அடைந்து வருகின்றன என அவர்கள் எச்சரித்தனர்.

சுற்றுச்சூழல் சேதத்திற்கு பெரும் எண்ணெய், எரிவாயு நிறுவனங்கள் பொறுப்பேற்க வேண்டும் என்றும், லாபத்தின் ஒரு பகுதியை புதுப்பிக்கத்தக்க எரிசக்திக்கு விரைவாக மாறுவதற்குச் செலவிட வேண்டும் என்றும் கோரிக்கைகள் எழுந்துள்ளன.