உள்ளூர் தேர்தல் கோலாலம்பூர் நிர்வாகக் கட்டமைப்பைப் பாதிக்கும்: சாத்தியக்கூறு அறிக்கை

கோலாலம்பூரில் உள்ளூர் தேர்தலை மீட்டெடுப்பது தலைநகரின் நிர்வாகக் கட்டமைப்பைப் பாதிக்கக்கூடும் என்றும், கோலாலம்பூர் கூட்டரசுப் பிரதேச ஒப்பந்தத்தில் இணங்கப்பட்ட நியமன அமைப்பை மாற்றிவிடும் என்றும், மலேசிய அனைத்துலக இஸ்லாமியப் பல்கலைக்கழகம் (UIAM) தயாரித்த கூட்டரசுத் தலைநகர் சட்டத் திருத்தங்கள் தொடர்பான இறுதி சாத்தியக்கூறு அறிக்கை தெரிவித்துள்ளது.

அந்த ஒப்பந்தத்தின் பிரிவு I-இன் கீழ் சிலாங்கூர் சுல்தான் கோலாலம்பூர் மீதான இறையாண்மையை ஒப்படைத்தார் என்றும், பிரிவு V தலைநகர் நிர்வாகக் கட்டமைப்பின் ஒரு பகுதியாக ஆலோசனை வாரியம் அமைப்பதற்கு வழிவகை செய்தது என்றும் அறிக்கை குறிப்பிட்டது.

"அதே நேரத்தில், சிலாங்கூர் சுல்தானால் பெயரிடப்படும் பிரதிநிதி ஒருவரை ஆலோசனை வாரியத்தில் நியமிக்க வழிவகை செய்வதன் மூலம், சிலாங்கூருடனான நிறுவன ரீதியான தொடர்பையும் இச்சட்டம் தக்கவைத்துள்ளது.

"உள்ளூர் தேர்தல் இணங்கப்பட்ட நியமன அமைப்பை மாற்றுவதுடன், அந்தப் பிரதேசம் ஒப்படைக்கப்பட்ட வேளையில் சிலாங்கூர் சுல்தானுக்கு வழங்கப்பட்ட அரசியலமைப்பு நிலைக்கும் சவால் விடுக்கக்கூடும்," என்று அறிக்கை கூறியது. (மேற்கோள்கள் மலாய் மொழியிலிருந்து மொழிபெயர்க்கப்பட்டவை.)

கோலாலம்பூர் கூட்டரசுப் பிரதேச ஒப்பந்தம் 1974 பிப்ரவரி 1-இல், அப்போதைய பேரரசர் சுல்தான் அப்துல் ஹலீம் முஅட்சம் ஷா கூட்டரசு அரசாங்கத்தின் சார்பிலும், அப்போதைய சிலாங்கூர் சுல்தான் சுல்தான் சலாஹுத்தீன் அப்துல் அஜீஸ் ஷா சிலாங்கூர் சார்பிலும் கையெழுத்திடப்பட்டது.

தலைநகர் நகர மக்களுக்கு மட்டுமல்ல, மலேசிய மக்கள் அனைவருக்கும் சொந்தமானது என்ற கொள்கையின் அடிப்படையில் கோலாலம்பூர் நிர்வாகம் அமைக்கப்பட்டதால், அதன் கொள்கை மற்றும் திசையை நிர்ணயிக்கும் உரிமை நாட்டின் உயர்நிலை நிர்வாக அமைப்பின் கையிலேயே இருக்க வேண்டும் என்றும் அறிக்கை கூறியது.

"சாலைகள், வீட்டுவசதி, கழிவுநீர் அமைப்பு போன்ற முக்கிய உள்கட்டமைப்பு மேம்பாட்டுக்கான நிதி, கோலாலம்பூர் மக்களிடமிருந்து மட்டுமல்ல, நாடு முழுவதிலுமுள்ள வரி செலுத்துவோர் நிதியிலிருந்தே வருகிறது," என்று அது கூறியது.

இன்று முன்னதாக, கெப்போங் நாடாளுமன்ற உறுப்பினர் லிம் லிப் எங், உள்ளூர் தேர்தலை மீட்டெடுக்கும் அதிகாரம் நாடாளுமன்றத்திற்கு உள்ளது என்று கூறி, குடியிருப்பாளர்களால் தேர்ந்தெடுக்கப்பட்ட பெரும்பான்மை உறுப்பினர்களைக் கொண்ட நகர மன்றம் அமைக்க கூட்டரசுத் தலைநகர் சட்டம் திருத்தப்பட வேண்டும் என்று வலியுறுத்தினார்.

தேர்தல் ஆணையத்திற்கு (SPR) உள்ளூர் தேர்தலை நடத்தும் அதிகாரம் வழங்குவதற்கு முன், உள்ளூராட்சி சட்டத்தின் தொடர்புடைய பிரிவுகளையும் திருத்த வேண்டும் அல்லது கோலாலம்பூரை அவற்றிலிருந்து வெளிப்படையாக விலக்க வேண்டும் என்று அவர் கூறினார்.

"DBKL-ஐ கண்காணிப்பவர்கள் அரசாங்கத்தால் நிர்ணயிக்கப்படாமல், கோலாலம்பூர் மக்களால் வாக்குப்பெட்டி வழியாகத் தேர்ந்தெடுக்கப்பட வேண்டும்" என்று லிம் வாதிட்டார்.