டிரம்பின் லாஸ் ஏஞ்சலஸ் கோல்ஃப் மைதானத்தில் ஆயுதம் ஏந்திய நபர் கைது

அமெரிக்க அதிபர் டொனால்ட் டிரம்புக்குச் சொந்தமான, லாஸ் ஏஞ்சலஸின் ரான்சோ பாலோஸ் வெர்டெஸில் அமைந்துள்ள கோல்ஃப் மைதானத்தில், அதிபரின் வருகைக்கு சில நாட்களுக்கு முன்னர் ஆயுதம் ஏந்திய ஒருவர் கைது செய்யப்பட்டுள்ளார்.

கலிஃபோர்னியாவின் டவுனி பகுதியைச் சேர்ந்த ஜெனைன் ஜான் டேலெ (38) என அடையாளம் காணப்பட்ட சந்தேக நபர், ஞாயிற்றுக்கிழமை மதியம் கைது செய்யப்பட்டதாக ஷெரிஃப் அலுவலகம் தெரிவித்தது.

சாதாரண உடையில் இருந்த கூட்டாட்சி முகவர்கள், அவர் "கோல்ஃப் மைதானப் பகுதி முழுவதும் நடந்து சென்று புகைப்படங்களும் காணொளிகளும் எடுத்து, பாதுகாப்பு ஏற்பாட்டு நடவடிக்கைகளைக் கண்காணிப்பது போல் தோன்றியதை" கண்டதாக அறிக்கை கூறியது.

கைது நடவடிக்கையின்போது, சந்தேக நபரின் காற்சட்டைப் பையிலிருந்து ஹாலோ-பாயிண்ட் தோட்டாக்கள் கொண்ட 16 குண்டு மேகசின் கைப்பற்றப்பட்டது.

அவரது வாகனத்தில் நடத்தப்பட்ட சோதனையில், சுடுவதற்குத் தயார் நிலையில் இருந்த ஒரு கைத்துப்பாக்கியும், ஹாலோ-பாயிண்ட் தோட்டாக்கள் நிரம்பிய மேலும் ஒரு மேகசினும் மீட்கப்பட்டன.

ஷெரிஃப் துறை மற்றும் FBI-இன் பயங்கரவாத எதிர்ப்புப் பிரிவு விசாரணையாளர்கள் பின்னர் டேலெவின் வீட்டில் சோதனை நடத்தி, தாக்குதல் ரக துப்பாக்கி, கைத்துப்பாக்கி, குண்டு துளைக்காத மேலங்கி, அதிக கொள்ளளவு மேகசின்கள், தோட்டாக்கள், இரு ரேடியோக்கள் மற்றும் "கவலையளிக்கும் கருத்துகள் அடங்கிய பல குறிப்பேடுகளை" கண்டெடுத்தனர்.

செவ்வாய்க்கிழமை காலை வழக்கு சமர்ப்பிக்கப்பட்ட நிலையில், குற்றச்சாட்டு தாக்கல் செய்யப்படுமா என்பதை லாஸ் ஏஞ்சலஸ் கவுண்டி மாவட்ட வழக்கறிஞர் அலுவலகம் முடிவு செய்யும்.

குடியரசுக் கட்சி தேசியக் குழு ஏற்பாடு செய்த நிதி திரட்டும் விருந்தில் கலந்துகொள்ள, டிரம்ப் செவ்வாய் மாலை உலங்கூர்தியில் அந்த கோல்ஃப் கிளப்புக்கு வந்தார்.

2024 தேர்தல் பிரசாரத்திற்குப் பிறகு டிரம்ப் பல படுகொலை முயற்சிகளுக்கு இலக்காகியுள்ளார்.