டிரம்பின் லாஸ் ஏஞ்சலஸ் கோல்ஃப் மைதானத்தில் கைது: துப்பாக்கி குற்றச்சாட்டு

அமெரிக்க அதிபர் டொனால்ட் டிரம்பின் லாஸ் ஏஞ்சலஸ், ரான்சோ பாலோஸ் வெர்டெஸ் கோல்ஃப் கிளப்பில் கைது செய்யப்பட்ட 38 வயது நபர் மீது துப்பாக்கி தொடர்பான குற்றச்சாட்டு பதிவு செய்யப்பட்டுள்ளது. அதிபர் அந்த இடத்திற்கு விஜயம் செய்வதற்கு சில நாட்களுக்கு முன்பு இந்தச் சம்பவம் நிகழ்ந்தது.

"இந்த நபரின் நோக்கம் குறித்து நாங்கள் இன்னும் விசாரணை நடத்தி வருகிறோம்; எனினும் அதிபரின் விஜயத்திற்கு முன்பே அவர் பிடிபட்டதற்கு நாங்கள் நன்றியுடன் இருக்கிறோம்," என்று அமெரிக்க முதன்மை உதவி வழக்கறிஞர் பில் எசாய்லி செவ்வாய்க்கிழமை இரவு வெளியிட்ட அறிக்கையில் தெரிவித்தார். (மொழிபெயர்ப்பு)

சந்தேக நபர் ஜெனைன் ஜான் டேலி அதிபரை இலக்காகக் கொண்டிருந்தார் என்பதற்கு எந்த ஆதாரத்தையும் அதிகாரிகள் இதுவரை வெளியிடவில்லை.

குற்றவியல் புகாரின்படி, வெள்ளிக்கிழமை கோல்ஃப் மைதானத்தில் டேலி முதன்முதலில் அதிகாரிகளின் கவனத்திற்கு வந்தார். அவர் "காதில் ஒலிக்கருவி அணிந்து கோல்ஃப் மைதானம் முழுவதும் நடந்து, கூட்டாட்சி முகவர்களின் பாதுகாப்புத் திட்ட நடவடிக்கைகளைப் புகைப்படங்களாகவும் காணொளிகளாகவும் பதிவு செய்து" கொண்டிருந்தார் எனக் கூறப்பட்டது.

ஞாயிற்றுக்கிழமை மீண்டும் அவர் அங்கு காணப்பட்டு கைது செய்யப்பட்டார். சோதனையின்போது அவரது கால்சட்டைப் பாக்கெட்டில் ஹோலோ பாயிண்ட் தோட்டாக்கள் அடங்கிய 16 தோட்டா இதழ் ஒன்றும், அவரது காரில் தோட்டாக்கள் நிரப்பப்பட்ட 9மிமீ கைத்துப்பாக்கி ஒன்றும் கண்டெடுக்கப்பட்டன.

தான் வெளியுறவுத் துறைக்காக பாதுகாப்புப் பணியில் இருந்ததாக சந்தேக நபர் முதலில் கூறினார். ஆனால் பின்னணி சோதனையில், திருட்டு வழக்கில் அவர் மீது பிடிவாரண்ட் இருப்பது தெரியவந்தது.

டேலியின் வீட்டில் நடத்தப்பட்ட சோதனையில் தாக்குதல் பாணி துப்பாக்கி, கைத்துப்பாக்கி, குண்டு துளைக்காத மேலாடை, அதிக கொள்ளளவு இதழ்கள், தோட்டாக்கள், இரு வானொலிக் கருவிகள் மற்றும் "கவலையளிக்கும் கருத்துகள் அடங்கிய பல குறிப்பேடுகள்" கண்டெடுக்கப்பட்டன என்று காவல்துறை தெரிவித்தது.

பதிவு செய்யப்படாத குறுகிய குழல் துப்பாக்கியை வைத்திருந்ததற்காக டேலி மீது தற்போது குற்றம் சாட்டப்பட்டுள்ளது. இது 10 ஆண்டுகள் வரை சிறைத்தண்டனை விதிக்கக்கூடிய கூட்டாட்சி குற்றம். கலிபோர்னியா சட்டத்தின் கீழும் பல துப்பாக்கி தொடர்பான குற்றச்சாட்டுகளை அவர் எதிர்கொள்கிறார்.

புதன்கிழமை லாஸ் ஏஞ்சலஸ் கூட்டாட்சி நீதிபதி முன் அவர் ஆஜராக உள்ளார்; பிணையில் விடுவிக்கப்படுவாரா என்பதை நீதிபதி தீர்மானிப்பார்.

நடுப்பதவிக்காலத் தேர்தலுக்கு முன் குடியரசுக் கட்சிக்கு நிதி திரட்டும் நோக்கில் செவ்வாய்க்கிழமை மாலை கோல்ஃப் கிளப்பில் நடைபெற்ற டிரம்பின் நிதி திரட்டும் விருந்து எந்த சம்பவமும் இன்றி நடந்து முடிந்தது.