ஐந்து நாள் காணாமல் போன மாற்றுத்திறனாளி பெண் சதுப்பு நிலத்தில் மீட்பு

சிரம்பான் – மனநலப் பிரச்சினை கொண்ட 66 வயது மாற்றுத்திறனாளி (OKU) பெண் ஐந்து நாள்களாகக் காணாமல் போயிருந்த நிலையில், நேற்று பிற்பகல் குவாலா சாவாவிலுள்ள பாயா லோம்போங் சேகா ஹிலிர் பகுதியில் பாதுகாப்பாக மீட்கப்பட்டதையடுத்து குடும்பத்தினரின் கவலை நீங்கியது.

அப்பெண் ஜூலை 31ஆம் தேதி கம்போங் சேகா தெங்கா ஹிலிரிலிருந்து காணாமல் போனதாகப் புகார் அளிக்கப்பட்டிருந்தது. ஒருங்கிணைந்த தேடல் மற்றும் மீட்புப் (SAR) பணியின் மூலம் நேற்று பிற்பகல் சுமார் 3.30 மணிக்கு அவர் கண்டுபிடிக்கப்பட்டார்.

சிரம்பான் மாவட்டக் காவல்துறைத் தலைவர், உதவி ஆணையர் மொகைட் யாத்திம் ஒஸ்மான் கூறுகையில், பெண் மிகவும் தளர்ந்த நிலையில் காணப்பட்டதாகவும், உடனடி முதலுதவி வழங்கப்பட்டதாகவும் தெரிவித்தார்.

“பின்னர் மேல் சிகிச்சைக்காக அவர் சிரம்பான் துங்கு ஜாஃபர் மருத்துவமனைக்கு (HTJ) அனுப்பப்பட்டார்,” என்று அவர் தொடர்பு கொள்ளப்பட்டபோது கூறினார். (மேற்கோள் மலாய் மொழியிலிருந்து மொழிபெயர்க்கப்பட்டது.)

மலேசிய அரச காவல்படை (PDRM), தீயணைப்பு மற்றும் மீட்புத் துறை (JBPM), ஒரு மோப்ப நாயுடன் கூடிய K9 பிரிவு ஆகியவற்றைச் சேர்ந்த 52 அதிகாரிகளும் பணியாளர்களும், கிராம மக்களும் தொடர்புடைய முகமைகளும் இந்தத் தேடல் பணியில் ஈடுபட்டதாக அவர் கூறினார்.

“பாதிக்கப்பட்டவர் பாதுகாப்பாக மீட்கப்படும் வரை பணியில் ஈடுபட்ட அனைவருக்கும் காவல்துறை நன்றி தெரிவிக்கிறது,” என்றார்.

முதியவர்கள், மாற்றுத்திறனாளிகள் அல்லது மனநலப் பிரச்சினை உள்ளவர்களைப் பராமரிக்கும் குடும்ப உறுப்பினர்கள் பாதுகாப்பில் எப்போதும் கவனம் செலுத்த வேண்டும் என்றும், தொடர் கண்காணிப்பு மற்றும் மருத்துவமனை ஆலோசனைப்படி தொடர் சிகிச்சை உறுதி செய்யப்பட வேண்டும் என்றும் மொகைட் யாத்திம் அறிவுறுத்தினார்.