அனைத்து விமானிகளுக்கும் போதைப்பொருள் பரிசோதனை கட்டாயம் – MAG

பெட்டாலிங் ஜெயா – மலேசியா ஏவியேஷன் குரூப் (MAG), தனது விமான நிறுவனங்களின் அனைத்து விமானிகளுக்கும் சிறுநீர் பரிசோதனையைக் கட்டாயமாக்கியுள்ளது. இது அனைத்து பணியாளர்களின் பாதுகாப்பு மற்றும் பணிக்கான தகுதியை வலுப்படுத்தும் நோக்கில் மேற்கொள்ளப்படுகிறது.

MAG குழுமத்தின் தலைவர் மற்றும் தலைமை நிர்வாக அதிகாரி கேப்டன் நசாருடின் ஏ. பாக்கார் கூறுகையில், முதற்கட்ட பரிசோதனையில் மலேசியா ஏர்லைன்ஸின் 1,260 விமானிகள் உள்ளடங்குவர்; இது வரும் ஆகஸ்ட் 15ஆம் தேதிக்குள் நிறைவடையும் என எதிர்பார்க்கப்படுகிறது.

நிர்ணயிக்கப்பட்ட தேதிக்குள் பரிசோதனையை முடிக்காத எந்த விமானியும், MAG-இன் நடைமுறைகள் மற்றும் ஒழுங்குமுறைத் தேவைகளுக்கு ஏற்ப தகுதியானவர் என உறுதிசெய்யப்படும் வரை விமானம் இயக்க அனுமதிக்கப்பட மாட்டார் என்று அவர் தெரிவித்தார்.

"ஒவ்வொரு விமானப் பயணத்திற்கும் முன், பணியிலுள்ள விமானிகள் உடல் மற்றும் மனநலத் தயார்நிலையை மதிப்பிடும் IMSAFER மதிப்பீட்டை நிறைவு செய்ய வேண்டும்.

"செயல்பாட்டு அபாயங்களைக் கண்டறிந்து நிர்வகிக்கும் அச்சுறுத்தல் மற்றும் பிழை மேலாண்மை (TEM) கோட்பாடுகளும் அந்த மதிப்பீட்டில் அடங்கும்," என்று அவர் இன்று வெளியிட்ட அறிக்கையில் கூறினார்.

தற்போதைய தகுதி மதிப்பீட்டின் அடிப்படையில்

பணிக்கு முந்தைய பரிசோதனைகள், விமானிகளுக்கான வகுப்பு 1 மருத்துவச் சான்றிதழ், மீள்பயிற்சி மற்றும் கால இடைவெளியிலான போதைப்பொருள் ஹ மது பரிசோதனைகள் ஆகியவற்றை உள்ளடக்கிய MAG-இன் தற்போதைய தகுதி மதிப்பீட்டின் அடிப்படையிலேயே இந்த வலுப்படுத்தப்பட்ட நடவடிக்கை எடுக்கப்பட்டுள்ளது என நசாருடின் கூறினார்.

"செயல்பாட்டுப் பாதுகாப்பும், பணியிலுள்ள பணியாளர்களின் தகுதியும் சமரசம் செய்யப்பட முடியாது," என்றார்.

"இந்த தனிப்பட்ட சம்பவம் எங்கள் பெரும்பாலான ஊழியர்களின் தொழில்முறைத் தரத்தைப் பிரதிபலிக்கவில்லை என்றாலும், பயணிகள் மற்றும் தொடர்புடையோரின் நம்பிக்கையைப் பேண பாதுகாப்பு நடவடிக்கைகளைத் தொடர்ந்து வலுப்படுத்துவோம்," என்று அவர் மேலும் கூறினார்.