அபாயகர சாலைகளில் 2 கி.மீ மரமற்ற வலயம்: பகாங் MCCC பரிந்துரை

கோலாலம்பூர்: பழைய கோலாலம்பூர்-கென்டிங் ஹைலண்ட்ஸ் சாலையில் வாகனத்தின் மீது மரம் விழுந்து நான்கு உயிர்கள் பறிபோன சோகத்தைத் தொடர்ந்து, காட்டுப் பகுதிகள் வழியே செல்லும் சாலைகளின் பாதுகாப்பை அரசாங்கம் மறுபரிசீலனை செய்ய வேண்டும் என வலியுறுத்தப்பட்டுள்ளது.

மலேசிய சமூக குற்ற அக்கறை அமைப்பின் (MCCC) பகாங் தலைவர் டேனியல் கூ, இதுபோன்ற சம்பவங்கள் மீண்டும் நிகழாமல் தடுக்க முழுமையான முன்தடுப்பு நடவடிக்கைகள் தேவை என்றார். அதில், அதிக ஆபத்துள்ளதாக அடையாளம் காணப்பட்ட சாலைகளின் இரு மருங்கிலும் இரண்டு கிலோமீட்டர் வரை மரமற்ற வலயம் அமைப்பதைப் பரிசீலிக்கலாம் என அவர் பரிந்துரைத்தார்.

வயது முதிர்ச்சி, கன மழை அல்லது பலத்த காற்றால் மரங்கள் சாய்ந்தாலும் அவை சாலையில் விழுந்து பயனாளர்களுக்கு அச்சுறுத்தலாக அமையாமல் இருக்க இந்தப் பரிந்துரை உதவும் என்றார்.

"கென்டிங் ஹைலண்ட்ஸ் செல்லும் சாலையை நாள்தோறும் ஆயிரக்கணக்கான வாகனங்கள் — சுற்றுலாப் பயணிகள், உள்ளூர்வாசிகள், பேருந்துகள், லாரிகள் — பயன்படுத்துகின்றன. அவர்களின் பாதுகாப்பே முன்னுரிமையாக இருக்க வேண்டும்.

"சோகம் நிகழ்ந்த பிறகுதான் நடவடிக்கை என்பது ஏற்புடையதல்ல," என்றார்.

மாறான் அம்னோ இளைஞர் பிரிவுத் தலைவர் மொஹ்ட் ராட்ஸி ரஹிமி உள்ளிட்ட ஒரே குடும்பத்தைச் சேர்ந்த நால்வர், அச்சாலையில் பயணித்தபோது பெரிய மரம் அவர்களின் நான்கு சக்கர வாகனத்தின் மீது விழுந்ததில் உயிரிழந்தனர்.

மரமற்ற வலயம் அமைக்கப்பட்டால் சாய்யும் மரங்கள் சாலையில் அல்லாமல் காட்டுப் பகுதிக்குள் விழும் என்று டேனியல் கூறினார்.

எனினும், அனைத்து மரங்களையும் வெட்டுவது நோக்கமல்ல; புவியியல் நிலை மற்றும் மரம் சாயும் சம்பவங்களின் அடிக்கடித் தன்மையை அடிப்படையாகக் கொண்டு அடையாளம் காணப்படும் குறிப்பிட்ட பகுதிகளே இதில் அடங்கும் என்று அவர் தெளிவுபடுத்தினார்.

மாநில அரசு, பொதுப்பணித் துறை (JKR), வனத்துறை மற்றும் உள்ளூர் அதிகார சபைகள் முக்கிய சாலைகளை ஒட்டிய பெரிய மரங்களுக்கு அவ்வப்போது பாதுகாப்பு தணிக்கை நடத்த வேண்டும் எனவும், ட்ரோன், டிஜிட்டல் வரைபடம், மர பராமரிப்பு நிபுணர் சேவைகளைப் பயன்படுத்தலாம் எனவும் அவர் பரிந்துரைத்தார்.

"முன்தடுப்பு நடவடிக்கையின் செலவு அதிகமாக இருக்கலாம்; ஆனால் விலைமதிப்பற்ற உயிர் இழப்புடன் ஒப்பிடும்போது அது மிகச் சிறியது," என்றார்.