சுல்தானின் ஆணைக்கு ஆதரவு: நில ஆக்கிரமிப்பாளர்களுக்குக் கடும் தண்டனை கோரிக்கை

கோலாலம்பூர் – மாநிலத்தின் ஒவ்வோர் அங்குல நிலமும் சட்டவிரோதத் திருத்துதல் மற்றும் ஆக்கிரமிப்பிலிருந்து பாதுகாக்கப்பட வேண்டும் என்ற பகாங் சுல்தான் அல்-சுல்தான் அப்துல்லா ரியாயுதீன் அல்-முஸ்தபா பில்லா ஷாவின் ஆணைக்கு மலேசிய சமூகக் குற்ற அக்கறை அமைப்பின் (MCCC) பகாங் கிளை முழு ஆதரவு தெரிவித்துள்ளது.

MCCC பகாங் தலைவர் டானியல் கூ, நில ஆக்கிரமிப்புப் பிரச்னை கவலைக்குரிய அளவில் அதிகரித்து வரும் நிலையில் சுல்தானின் ஆணை சரியான நேரத்தில் வந்துள்ளதாகக் கூறினார்.

அரசாங்க நிலம் பாதுகாக்கப்பட வேண்டிய சொத்து எனவும், அனுமதியின்றி மேற்கொள்ளப்படும் எந்த ஆக்கிரமிப்பும் சட்டத்தை மீறுவதோடு, வளர்ச்சிக்குப் பயன்படுத்தப்பட வேண்டிய வருவாயை மாநில அரசு இழக்கச் செய்வதாகவும் அவர் சுட்டிக்காட்டினார்.

"அரசாங்க நிலம் ஆக்கிரமிக்கப்பட்டு சட்டவிரோதமாகப் பயன்படுத்தப்படும்போது, வரி, நிலப் பிரீமியம் மற்றும் பிற கட்டணங்கள் மூலம் கிடைக்க வேண்டிய வருவாயை மாநிலம் இழக்கிறது. இந்த இழப்பு இறுதியில் மாநில வளர்ச்சியையும் மக்கள் நலனையும் பாதிக்கிறது.

"அதனால்தான் ஒவ்வோர் அங்குல நிலமும் பாதுகாக்கப்பட வேண்டும் என்ற துவாங்கூவின் ஆணைக்கு நாங்கள் முழு ஆதரவு அளிக்கிறோம். சுயலாபம் மட்டுமே நோக்கமாகக் கொண்டவர்களால் மாநிலச் செல்வம் சுரண்டப்படக் கூடாது," என்றார் (மலாய் மொழியிலிருந்து மொழிபெயர்க்கப்பட்டது).

நில ஆக்கிரமிப்பு பகாங்கின் நற்பெயரைப் பாதிப்பதோடு, காடழிப்பு மற்றும் கட்டுப்பாடற்ற நிலத் திறப்பு போன்ற செயல்களுக்கும் வழிவகுக்கும் எனவே இதை இலகுவாக எடுத்துக்கொள்ள முடியாது என்றார்.

அபாய வலயங்களில் கண்காணிப்பு நடவடிக்கைகளைத் தீவிரப்படுத்தவும், ஆக்கிரமிப்பில் ஈடுபடும் தனிநபர்கள் அல்லது கும்பல்களுக்கு எதிராக உடனடி நடவடிக்கை எடுக்கவும் மாநில அரசையும் அமலாக்க முகமைகளையும் அவர் வலியுறுத்தினார்.

"சட்டத்திற்கு மேல் யாரும் இல்லை. அரசாங்க நிலத்தை ஆக்கிரமிப்பவர் எந்தப் பதவியில் இருந்தாலும் நீதிமன்றத்திற்குக் கொண்டுவரப்பட வேண்டும். அமலாக்கம் பருவகாலமாக இருக்கக் கூடாது; தொடர்ச்சியாக மேற்கொள்ளப்பட வேண்டும்," என்றார்.

தீவிரக் குற்றங்களுக்கு, குறிப்பாக கும்பல்கள் அல்லது பெரிய அளவிலான ஆக்கிரமிப்புகளுக்கு, 10 ஆண்டுகள் வரை சிறை மற்றும் ரிம1 மில்லியன் வரை அபராதம் விதிக்கும் வகையில் சட்டத் திருத்தம் மேற்கொள்ளப்பட வேண்டும் எனவும் அவர் பரிந்துரைத்தார்.

சந்தேகத்திற்கிடமான செயல்கள் குறித்துத் தகவல் அளிக்குமாறு பொதுமக்களையும் அவர் கேட்டுக்கொண்டார். – உத்துசான்