நியூ மெக்சிகோ மீட்பு நிதிக்கு RM2.32 பில்லியன் செலுத்த மெட்டாவுக்கு உத்தரவு

வாஷிங்டன் – அமெரிக்காவின் நியூ மெக்சிகோ மாநிலத்தில் அமைக்கப்பட்டுள்ள மீட்பு நிதிக்கு 567 மில்லியன் அமெரிக்க டாலர் (RM2.32 பில்லியன்) செலுத்துமாறு தொழில்நுட்பப் பெருநிறுவனமான மெட்டாவுக்கு நீதிமன்றம் உத்தரவிட்டுள்ளது.

அந்நிறுவனத்தின் சமூக ஊடக தளங்கள் பொது இடையூறை ஏற்படுத்தியதுடன், இளையோர் மத்தியில் மனநல நெருக்கடியையும் தூண்டியதாக நீதிமன்றம் கண்டறிந்ததை அடுத்து இந்த உத்தரவு பிறப்பிக்கப்பட்டது.

நியூ மெக்சிகோ நியாயமற்ற வணிக நடைமுறைச் சட்டத்தை மீறியதாகக் கண்டறியப்பட்டதைத் தொடர்ந்து, இந்த ஆண்டின் தொடக்கத்தில் மெட்டா 375 மில்லியன் டாலர் (RM1.53 பில்லியன்) சிவில் அபராதம் செலுத்த வேண்டியிருந்தது. அதற்குப் பிறகு இந்தப் புதிய நிதித் தண்டனை விதிக்கப்பட்டுள்ளது.

மெட்டா நிறுவனத்தை தொழில்நுட்பத் தொழிலதிபர் மார்க் சக்கர்பர்க் நிறுவினார்.

கடந்த மே மாதம் தொடங்கிய இரண்டாம் கட்ட விசாரணை, நிறுவனத்தின் நடவடிக்கைகள் பொது இடையூறாக அமைந்து அதன் தயாரிப்புகளில் மாற்றங்களைக் கோரும் அளவுக்கு உள்ளதா என்பதைத் தீர்மானிக்கும் நோக்கில் நடத்தப்பட்டது.

நீதிபதி பிரையன் பீட்ஷைட் தமது தீர்ப்பில், மெட்டா மட்டுமே இதற்குக் காரணமல்ல என்றாலும், விசாரணையின்போது சமர்ப்பிக்கப்பட்ட வலுவான சான்றுகளின் அடிப்படையில், அந்நிறுவனத்தின் சமூக ஊடக தளங்கள் நியூ மெக்சிகோவின் இளையோர் மனநல நெருக்கடிக்கு முக்கியப் பங்களிப்புக் காரணியாக இருந்தது நிரூபிக்கப்பட்டுள்ளது எனக் குறிப்பிட்டார்.

நிதி பயன்பாடு

மொத்த நிதியில் 420 மில்லியன் டாலர் (RM1.71 பில்லியன்), அத்தளங்களால் பாதிக்கப்பட்டவர்களுக்கு சிகிச்சை அளிப்பதற்கென ஒதுக்கப்படும்.

மீதமுள்ள தொகை விழிப்புணர்வு, தடுப்பு, மதிப்பீடு, திரையிடல் திட்டங்களுக்கும், ஆதரவு சேவைகளின் தரத்தை மேம்படுத்தவும் பயன்படுத்தப்படும்.

1990களில், தங்கள் தயாரிப்புகளின் ஆபத்துகள் குறித்து பொதுமக்களைத் தவறாக வழிநடத்தியதற்காக புகையிலை நிறுவனங்கள் பில்லியன் கணக்கான டாலர்களை செலுத்த நிர்பந்திக்கப்பட்டன. இதனால் அத்தொழிற்துறையின் செல்வாக்கு கடுமையாகச் சரிந்தது.

இவ்வழக்கில் மொத்தம் 62.85 பில்லியன் டாலர் (RM257.1 பில்லியன்) வரை அபராதம் விதிக்குமாறு நியூ மெக்சிகோ அரசு வழக்கறிஞர் பரிந்துரைத்ததாக, மெட்டா தனது முதல் காலாண்டு நிதி அறிக்கையில் உறுதிப்படுத்தியுள்ளது. – ஏஜென்சி