டிராப்சோன்ஸ்போருக்கு மாறும் எதிர்பார்ப்பில் துருக்கிக்கு வந்த சலாஹ்

எகிப்திய கால்பந்து முன்கள வீரர் முகமட் சலாஹ், துருக்கி அணி டிராப்சோன்ஸ்போருக்கு (Trabzonspor) மாறுவார் என்ற எதிர்பார்ப்புக்கு மத்தியில் துருக்கிக்கு வந்துள்ளார்.

சலாஹ்வுடன் பேச்சுவார்த்தை நடத்தி வருவதாக டிராப்சோன்ஸ்போர் ஒரு நாள் முன்னதாக அறிவித்திருந்தது. கருங்கடல் நகரில் வியாழக்கிழமை நடைபெறும் விழாவில், 34 வயதான அந்த வீரரை இலவச இடமாற்றத்தில் (free transfer) கைச்சாத்திடுவார் என எதிர்பார்க்கப்படுகிறது என்று அணியின் தலைவர் எர்துருல் டோகன் தெரிவித்தார்.

"டிராப்சோன், நீங்கள் தயாரா? உங்கள் குரல் கேட்கிறது. விரைவில் சந்திப்போம்," என்று அணி X தளத்தில் வெளியிட்ட காணொளியில் சலாஹ் கூறினார்.

டிராப்சோன்ஸ்போர் சீருடை அணிந்திருந்த அவர், அணியின் முழக்கத்தைக் குறிப்பிட்டு, "எங்களுக்கு எங்கும் டிராப்சோன்," எனவும் கூறினார்.

அட்டாதுர்க் விமான நிலையத்தை அவர் அடைந்தபோது, நூற்றுக்கணக்கான ரசிகர்கள் அவரை வரவேற்றனர். ஆதரவாளர்களுக்கு கை அசைத்த அவர், அவர்களுடன் சேர்ந்து பாரம்பரிய முழக்கத்தையும் தொடங்கினார். பின்னர் மருத்துவப் பரிசோதனைக்குச் சென்றார்; அதன் பிறகு கிழக்கு நோக்கி டிராப்சோன் நகருக்குப் பயணிக்கத் திட்டமிடப்பட்டிருந்தது.

ஒன்பது ஆண்டுகளுக்குப் பிறகு இந்தக் கோடையில் சலாஹ் லிவர்பூல் அணியை விட்டு விலகினார். அந்த அணிக்காக 442 ஆட்டங்களில் 257 கோல்கள் அடித்த அவர், இரண்டு முறை பிரீமியர் லீக் கோப்பையையும், ஒரு முறை சாம்பியன்ஸ் லீக் கோப்பையையும் வென்றார்.