தபுங் ஹாஜி ஜகாத்: ஷரியா முடிவை மதிக்க வேண்டும் என்கிறார் பகாங் முஃப்தி

பெட்டாலிங் ஜெயா – தபுங் ஹாஜி (TH) நிறுவனத்தின் 2016 முதல் 2019 வரையிலான ஜகாத் பிரச்சினை, ஏற்கெனவே செலுத்தப்பட்ட ஜகாத் செல்லுமா என்பது குறித்தது அல்ல; மாறாக அப்போது பயன்படுத்தப்பட்ட ஒப்பந்தம் (அகத்) தொடர்பான ஆய்வே ஆகும் என பகாங் முஃப்தி பேராசிரியர் டத்தோ டாக்டர் அஸ்மாடி முகமட் நயீம் தெரிவித்தார்.

இன்று முகநூலில் வெளியிட்ட பதிவில், அரச விசாரணை ஆணையத்தின் (RCI) அறிக்கை, அக்காலகட்டத்தில் தபுங் ஹாஜி செலுத்திய ஜகாத் செல்லாது என்று ஒருபோதும் முடிவு செய்யவில்லை என்று அவர் கூறினார். அது தபுங் ஹாஜிக்கும் வைப்பாளர்களுக்கும் இடையிலான ஒப்பந்தத்தின் ஷரியா மற்றும் சட்ட நிலையை விவாதித்து, மேம்பாடுகளை பரிந்துரைத்ததாக அவர் கூறினார்.

"RCI அறிக்கையில் விவாதிக்கப்பட்ட பிரச்சினை, செலுத்தப்பட்ட ஜகாத் செல்லுமா செல்லாதா என்பது அல்ல.

"அதைத் தனித்துப் புரிந்துகொண்டு, தபுங் ஹாஜி செலுத்திய ஜகாத் செல்லாதது என்ற முடிவுக்கு வரக்கூடாது," என்றார். (மலாய் மொழியிலிருந்து மொழிபெயர்க்கப்பட்டது.)

RCI பரிந்துரைக்கு இணங்க, 2024 ஜூன் 24 அன்று தபுங் ஹாஜி செய்த விளக்கத்தின் மூலம் இப்பிரச்சினை மலேசிய இஸ்லாமிய மத விவகாரங்களுக்கான தேசிய கவுன்சிலின் (MKI) முஷாவரா அவைக்கு பரிந்துரைக்கப்பட்டதாக அவர் கூறினார். இது தனிநபர் கருத்து அல்லது பொதுமக்களின் ஊகத்தின் அடிப்படையில் அல்லாமல், சரியான ஷரியா வழிமுறையின் மூலம் தீர்வு காணப்பட்டதைக் காட்டுகிறது என்றார்.

வதீஆவிலிருந்து வகாலாவுக்கு

2018-க்குப் பிறகு நடத்தப்பட்ட ஷரியா ஆய்வில், அதற்கு முன் பயன்படுத்தப்பட்ட 'வதீஆ' ஒப்பந்தக் கருத்தை முழுமையாகப் பயன்படுத்த முடியவில்லை என்பது கண்டறியப்பட்டது; தபுங் ஹாஜியின் சட்ட நிலை அந்தக் கருத்தை முழுமையாக நடைமுறைப்படுத்த அனுமதிக்கவில்லை என அஸ்மாடி கூறினார்.

"தபுங் ஹாஜிக்கும் வைப்பாளர்களுக்கும் இடையிலான உறவின் யதார்த்தம், நிதி மேலாளர்–முதலீட்டாளர் கருத்துக்கு நெருக்கமானது. எனவே வணிக ஜகாத் அணுகுமுறையின் அடிப்படையில் ஜகாத் கணக்கிட முடியும்," என்றார்.

இதன் அடிப்படையில், அனைத்து உண்மைகள், ஆவணங்கள் மற்றும் நிறுவனத்தின் செயல்பாட்டு யதார்த்தத்தை ஆய்வு செய்த பின், அக்காலகட்டத்தில் பயன்படுத்தப்பட்ட ஜகாத் கணக்கீட்டு முறை ஷரியாவின்படி ஏற்கத்தக்கது என தபுங் ஹாஜியின் ஷரியா குழு முடிவு செய்தது.

ஒப்பந்த நடைமுறையில் உள்ள குறைபாடுகள், பரிவர்த்தனையின் முக்கிய அம்சங்கள் நிறைவேறியிருக்கும் போது, முழு ஷரியா உறவையும் செல்லாததாக்காது என்றார். மக்களுக்கு சிரமத்தைத் தவிர்க்கும் 'ரஃபுல் ஹரஜ்' கொள்கையும் பரிசீலிக்கப்பட்டது.

2019 முதல் 'வகாலா' ஒப்பந்தத்தைப் பயன்படுத்தியதால் தற்போதைய செயல்பாடுகளில் இப்பிரச்சினை எழவில்லை என்றார்.

"சட்டப்படி அதிகாரம் பெற்ற வல்லுநர்களால் இஜ்திஹாத் மூலம் எடுக்கப்பட்ட ஷரியா நிறுவனங்களின் முடிவுகளை பொதுமக்கள் மதிக்க வேண்டும்," என்றார்.