அமெரிக்க ஆதரவு காசா திட்டத்திற்கு இஸ்ரேல் ஒப்புக்கொள்ளவில்லை: நெதன்யாகு

அமெரிக்காவின் ஆதரவுடன் முன்வைக்கப்பட்ட காசா திட்ட வரைவுக்கு இஸ்ரேல் ஒப்புக்கொள்ளவில்லை என இஸ்ரேலிய பிரதமர் பென்யமின் நெதன்யாகு தெரிவித்தார். அந்த ஆவணம் இஸ்ரேலால் தயாரிக்கப்பட்டதல்ல என்றும் அவர் வலியுறுத்தினார்.

செவ்வாய்க்கிழமை இரவு தமது சமூக ஊடக கணக்குகளில் வெளியிட்ட காணொலியில், அமெரிக்க அதிபர் டொனால்ட் டிரம்பின் குழு "ஹமாஸின் ஆயுதங்களைக் களைவதையும் காசாவை படைநீக்கம் செய்வதையும் தாங்கள் நிறைவேற்ற முடியும் என நம்புகிறது" என நெதன்யாகு கூறினார்.

"நாங்கள் இதைப் பரிசோதித்து வருகிறோம். அவர்கள் எங்களுக்கு ஒரு வரைவை அனுப்பினார்கள் — நாங்கள் அதற்கு ஒப்புக்கொள்ளவில்லை, அது எங்கள் வரைவு அல்ல. எங்கள் கருத்துகளை அனுப்பியுள்ளோம்," என்று அவர் கூறினார். (மொழிபெயர்ப்பு)

திங்கள்கிழமை அமெரிக்க ஆதரவு பெற்ற "Board of Peace" அமைப்புடன் நெதன்யாகு சந்திப்பு நடத்தினார். ஹமாஸ் ஆயுதங்களைக் களைந்த பின்னரே காசாவில் தற்போதைய நிலைகளிலிருந்து இஸ்ரேலிய படைகள் வெளியேற வேண்டியிருக்கும் என்ற உறுதிமொழி அவருக்கு அளிக்கப்பட்டது.

எனினும், இந்த ஒப்பந்தத்தை நிராகரிக்க வேண்டும் என அவரது தீவிர வலதுசாரி கூட்டணி கூட்டாளிகளிடமிருந்து பிரதமர் மீதான அழுத்தம் அதிகரித்து வருகிறது.

ஹமாஸின் ஆயுதக் களைவு மற்றும் காசா படைநீக்கம் தொடர்பான பேச்சுவார்த்தைகள் தொடர்ந்தாலும், இஸ்ரேலின் நிலைப்பாட்டுக்கும் வாஷிங்டன் முன்வைத்த கட்டமைப்புக்கும் இடையே இடைவெளி இருப்பதை அவரது கருத்துகள் காட்டுகின்றன.