மேற்படிப்புக்காக PKR துணைத் தலைவர் பதவியை விடுத்த நூருல் இஸ்ஸா

பெட்டாலிங் ஜெயா – மக்கள் நீதிக் கட்சி (PKR) துணைத் தலைவர் பதவியை விடுவிக்கும் தமது முடிவுக்கு, மேற்படிப்பைத் தொடர விரும்புவதே காரணம் என நூருல் இஸ்ஸா அன்வர் விளக்கினார்.

நீண்ட பரிசீலனைக்குப் பிறகு இந்த முடிவு எடுக்கப்பட்டது எனக் கூறிய அவர், அரசியல் உலகுடன் கட்டுப்பட்டிராத வகையில் சேவையைத் தொடர இந்த நடவடிக்கை வழிவகுக்கும் என்றார்.

எனினும், தாம் PKR உறுப்பினராகத் தொடர்ந்து இருப்பதோடு, கட்சியின் போராட்டத்திற்கு ஆதரவு அளிப்பேன் என அவர் வலியுறுத்தினார்.

"சிறந்த மலேசியாவை நோக்கிய போராட்டத்திற்கு ஆதரவு அளித்து, நான் PKR உறுப்பினராகத் தொடர்ந்திருப்பேன்," என அவர் நேற்று இரவு வெளியிட்ட அறிக்கையில் தெரிவித்தார். (மலாய் மொழியிலிருந்து மொழிபெயர்க்கப்பட்டது)

அதே வேளையில், தமது முடிவைக் கவனத்தில் கொண்டதற்காக PKR தலைவர் டத்தோ ஸ்ரீ அன்வர் இப்ராஹிம் மற்றும் கட்சித் தலைமைக்கு அவர் நன்றி தெரிவித்தார்.

துணைத் தலைவர் பொறுப்பை ஏற்கவுள்ள டத்தோ ஸ்ரீ சைபுத்தீன் நசுஷன் இஸ்மாயில் மற்றும் தேர்தல் இயக்குநராகச் செயல்படும் டத்தோ ஸ்ரீ அமிருடின் ஷாரி ஆகியோர் பொறுப்பை சிறப்பாக நிறைவேற்றுவார்கள் என்று தமக்கு நம்பிக்கை உள்ளதாக நூருல் இஸ்ஸா கூறினார்.

"PKR துணைத் தலைவர் பதவியை விடுவிக்கும் எனது முடிவைக் கவனத்தில் கொண்டதற்காக தலைவருக்கும் கட்சித் தலைமைக்கும் எனது முழு நன்றியைத் தெரிவிக்கிறேன்.

"மக்களின் நம்பிக்கையைச் சுமப்பதில் டத்தோ ஸ்ரீ சைபுத்தீன் நசுஷன் இஸ்மாயிலும் டத்தோ ஸ்ரீ அமிருடின் ஷாரியும் ஞானத்துடனும் விவேகத்துடனும் விடாமுயற்சியுடனும் இந்தப் பொறுப்பை நிறைவேற்றுவார்கள் என நம்புகிறேன்.

"இந்தப் பொறுப்பை ஏற்கும் அவர்களின் ஒவ்வொரு பணியும் எளிதாக அமைய பிரார்த்திக்கிறேன்," என்றார்.

இதற்கு முன்பு Kosmo! செய்தி வெளியிட்டதன்படி, PKR-இன் மத்திய தலைமைக் குழு (MPP) வியாழக்கிழமை நூருல் இஸ்ஸாவுக்கு துணைத் தலைவர் பொறுப்பில் தற்காலிக விடுமுறை வழங்க முடிவு செய்தது.

PKR தகவல் தலைவர் டத்தோ ஸ்ரீ ஃபாமி ஃபாட்ஸில், நூருல் இஸ்ஸா பதவியிலிருந்து விலகக் கோரிய விண்ணப்பம் விவாதிக்கப்பட்ட பின்னர் MPP கூட்டத்தில் இந்த முடிவு எடுக்கப்பட்டது எனத் தெரிவித்தார்.