ஜோஜோவுடன் மீள்போட்டிக்கு ஒண்டாஷ் மறுப்பு

பெட்டாலிங் ஜெயா: முஹம்மட் ஜோஹான் கசாலி சுல்பிக்கார் (ஜோஜோ) மற்றும் ரமதான் ஒண்டாஷ் இடையே மீள்போட்டி நடக்கும் என்ற முவாய் தாய் ரசிகர்களின் எதிர்பார்ப்பு மங்கிவிட்டது. லெபனான் வீரர் மீண்டும் மோதுவதில் தனக்கு விருப்பமில்லை என்பதைச் சுட்டிக்காட்டியுள்ளார்.

கடந்த வாரம் பாங்கொக், லும்பினி அரங்கில் நடைபெற்ற ONE Friday Fights 164 போட்டியில் பிரிந்த தீர்ப்பு (split decision) மூலம் ஜோஜோவை வீழ்த்திய பின் தனது பணி முடிந்துவிட்டது என வலியுறுத்தி, இன்ஸ்டாகிராம் பதிவின் வழியே ஊகங்களுக்கு ஒண்டாஷ் முற்றுப்புள்ளி வைத்தார்.

"என் வேலை முடிந்துவிட்டது, மீள்போட்டி இல்லை, நான் ஒரு பல் காப்பான் வாங்கப் போகிறேன்," என்று ஒண்டாஷ் தனது இன்ஸ்டாகிராமில் தெரிவித்தார்.

இரு வீரர்களுக்கும் இடையே மீள்போட்டி நடைபெற வாய்ப்புள்ளது என ONE Championship தலைமைச் செயல் அதிகாரி சத்ரி சித்யோதோங் முன்னர் அளித்த சுட்டிக்காட்டலுக்கு இந்த அறிக்கை முரணாக உள்ளது.

கடந்த வாரப் போட்டி முடிந்த உடனேயே, ஜோஜோ பகிரங்கமாக ஒண்டாஷுக்கு மீண்டும் மோதும் சவால் விடுத்தார்; அப்போது லெபனான் வீரரும் அதற்கு நேர்மறையாக பதிலளித்திருந்தார்.

எனினும், ஒண்டாஷின் நிலைப்பாடு இப்போது மாறியுள்ளது. மீள்போட்டிக்கான எந்த வாய்ப்பையும் அவர் நிராகரிப்பதால், சர்ச்சைக்குரிய அந்த அத்தியாயம் அரங்கில் தீர்க்கப்படுவதைக் காண விரும்பிய ரசிகர்களின் கனவு கடினமாகியுள்ளது.

மூன்று சுற்றுகளில் ஒண்டாஷின் பல் காப்பான் ஐந்து முறை கழன்று விழுந்ததால் இந்தப் போட்டி பெரும் விவாதத்தைக் கிளப்பியது. அந்த சம்பவங்கள் ஜோஜோவின் தாளத்தையும் வேகத்தையும் பாதித்ததா என்ற கேள்வியை ரசிகர்கள் எழுப்பினர். – உத்துசான்