விமானி போதைப்பொருள் கும்பலுடன் தொடர்பா? ஜகார்த்தா செல்லும் புக்கிட் அமான் குழு

போதைப்பொருள் கடத்தல் குற்றச்சாட்டில் இந்தோனேசியாவில் தடுத்து வைக்கப்பட்டுள்ள மலேசிய விமானி தொடர்பான விசாரணையை நிறைவு செய்வதற்காக, புக்கிட் அமான் போதைப்பொருள் குற்றப் புலனாய்வுத் துறையின் (NCID) விசாரணை அதிகாரிகள் மற்றும் உளவுத்துறை அதிகாரிகள் அடங்கிய குழு ஆகஸ்ட் 11 முதல் 15 வரை ஜகார்த்தாவில் இருக்கும்.

இந்தப் போதைப்பொருள் விநியோகத்தின் அனைத்து அம்சங்களும் ஆராயப்படும் என NCID இயக்குநர் ஹுசைன் ஓமர் கான் தெரிவித்தார்.

"சந்தேக நபர் எங்கிருந்து பொருளைப் பெற்றார், எந்தக் கும்பல் ஈடுபட்டது, KLIA-வின் பாதுகாப்புச் சோதனையை அவர் எப்படிக் கடந்தார், இந்தோனேசியக் கும்பலுடன் அவருக்கு உள்ள தொடர்பு ஆகியவை இதில் அடங்கும்," என்று அவர் பெர்னாமாவிடம் கூறினார்.

பிற தரப்புகளின் ஈடுபாட்டு வாய்ப்பு உட்பட, முழு விநியோகச் சங்கிலியை அடையாளம் காண்பது முக்கியம் என்று ஹுசைன் கூறினார்.

அந்த விமானி இந்தோனேசியாவில் சட்ட நடவடிக்கைகளை எதிர்கொள்ள வேண்டியிருப்பதால், அவரை நாடு கடத்திக் கொண்டுவர மலேசியா கோரிக்கை விடுக்கப் போவதில்லை என்றும் அவர் மேலும் கூறினார்.

39 வயதான அந்த விமானி, 25 கிலோ போதைப்பொருளைக் கடத்த முயன்றதாகக் கூறப்படும் நிலையில், சுகர்னோ-ஹட்டா சர்வதேச விமான நிலையத்தின் மூன்றாம் முனையத்தில் இந்தோனேசிய அதிகாரிகளால் தடுத்து வைக்கப்பட்டார்.

சோதனையில் 70,114 எக்ஸ்டசி மற்றும் மெத்தாம்பெட்டமீன் காப்ஸ்யூல்கள் அடங்கிய 15 பொதிகள் கண்டுபிடிக்கப்பட்டதாகவும், அவற்றின் சந்தை மதிப்பு சுமார் RM45 மில்லியன் என மதிப்பிடப்பட்டதாகவும் தெரிவிக்கப்பட்டது.

தொடர்புடைய நிலையில், விசாரணையின் ஒரு பகுதியாக KLIA விமானப் பாதுகாப்புப் பிரிவு (Avsec) இரு உறுப்பினர்களின் வாக்குமூலங்கள் இரண்டு நாட்களுக்கு முன்பு பதிவு செய்யப்பட்டன என ஹுசைன் கூறினார்.

இதுவரை யாரும் கைது செய்யப்படவில்லை; எனினும் அந்த Avsec அதிகாரிகளுக்கு சந்தேக நபருடன் நேரடித் தொடர்பு இல்லை என்பது விசாரணையில் தெரிந்ததாக அவர் கூறினார்.

சுராபயாவின் ஜுவாண்டா சர்வதேச விமான நிலையத்தில் 22 வயது மற்றொரு மலேசிய ஆடவர் கைது செய்யப்பட்ட விவகாரத்தில், இரு வழக்குகளுக்கும் இடையே தொடர்பு உள்ளதா என்பதை காவல்துறை விசாரிக்கிறது என்றார்.

சுராபயா வழக்கின் விசாரணை சற்றுச் சவாலானது என்றும், தொலைபேசி எண் பதிவுக்கு மூன்றாம் தரப்பு தகவல்களைப் பயன்படுத்தி, கண்டறியப்படுவதைத் தவிர்க்க சமூக ஊடகங்கள் வழியாகக் கும்பல் தொடர்பு கொண்டதாக காவல்துறை நம்புகிறது என்றும் அவர் கூறினார்.