MyIMMs முறைமை ஊடுருவல்: முதல் நாளிலேயே அதிகாரிகள் அடையாளம் காணப்பட்டனர் — குடிநுழைவுத் தலைமை இயக்குநர்

புத்ராஜெயா: MyIMMs முறைமை ஊடுருவல் வழக்கில் சம்பந்தப்பட்ட அதிகாரிகள் சம்பவம் நடந்த முதல் நாளிலேயே அடையாளம் காணப்பட்டனர் என்றும், ஆனால் சூத்திரதாரிகளுக்கு எதிராக ஆதாரம் சேகரிக்க வேண்டி உடனடி நடவடிக்கை தவிர்க்கப்பட்டது என்றும் குடிநுழைவுத் துறை தலைமை இயக்குநர் ஸகாரியா தெரிவித்தார்.

அனைத்து சம்பந்தப்பட்டவர்களையும் கண்டறிந்து வழக்கை வேரோடு களைய, குடிநுழைவுத் துறையும் மலேசிய ஊழல் தடுப்பு ஆணையமும் (MACC) சரியான தருணத்திற்காகக் காத்திருப்பதாக அவர் கூறினார்.

"உண்மையில், சம்பவம் நடந்த முதல் நாளிலேயே சம்பந்தப்பட்ட அதிகாரிகளை எங்களால் அடையாளம் காண முடிந்தது. ஆனால் உடனே நிறுத்திவிட்டால், யார் யார் ஈடுபட்டுள்ளனர் என்பதைப் பிடிக்க முடியாது என்ற அணுகுமுறையை நான் எடுத்தேன்.

"அதனால்தான், இதில் யார் குற்றவாளி அல்லது சூத்திரதாரி என்பதற்கான ஆதாரங்களைச் சேகரிக்கும் வரை அதை விட்டுவைத்தோம்," என்று புத்ராஜெயாவில் நடந்த குடிநுழைவுத் துறையின் மாதாந்திரக் கூட்டத்தில் அவர் பேசியதாக பெர்னாமா செய்தி வெளியிட்டது. (மலாய் மொழியிலிருந்து மொழிபெயர்க்கப்பட்டது.)

இனி எச்சரிக்கை இல்லை

ஊழல் அல்லது அதிகார துஷ்பிரயோகம் உள்ளிட்ட தவறான நடத்தையில் ஈடுபடும் எந்த அதிகாரியையும் துறை பாதுகாக்காது என ஸகாரியா வலியுறுத்தினார்.

"flying passport", "counter setting" செயல்பாடுகளிலும், தற்காலிக வேலை வருகை அனுமதிச் சீட்டு (PLKS) முறையற்ற வகையில் அங்கீகரிக்கப்படுவதிலும் சில ஊழியர்கள் உடந்தையாக இருப்பதாகத் தகவல்கள் இன்னும் கிடைத்து வருவதாக அவர் கூறினார்.

"நான் பலமுறை எச்சரித்துவிட்டேன்; இப்போது எச்சரிக்கை இல்லை. இனி எச்சரிக்கையும் இல்லை, நினைவூட்டலும் இல்லை. நேரடியாக நடவடிக்கை எடுப்போம்," என்றார்.

ஒவ்வொரு குடிநுழைவுப் பரிவர்த்தனையும் நெருக்கமாகக் கண்காணிக்கப்படுவதாக அவர் அதிகாரிகளுக்கு நினைவூட்டினார்.

"நடந்தது மற்ற அதிகாரிகளுக்குப் பாடமாக அமைய வேண்டும். யாராவது ஏதேனும் செய்து கொண்டிருந்தால், நாங்கள் நடவடிக்கை எடுப்பதற்கு முன் நிறுத்திவிடுங்கள். நான் முன்பே சொன்னது போல், என்னிடம் தகவல் இருக்கிறது."

இதுவரை 17 பேர் கைது

PLKS விண்ணப்பங்களைச் சட்டவிரோதமாக அங்கீகரிக்க MyIMMs முறைமையை ஊடுருவ சதி செய்ததாக 11 குடிநுழைவு அதிகாரிகள் கைது செய்யப்பட்டுள்ளனர்.

கடந்த வாரம் மேலும் ஆறு பேர் — இரண்டு நிறுவன இயக்குநர்கள், மூன்று வெளிநாட்டவர் மற்றும் ஒரு காவல் அதிகாரி — கைது செய்யப்பட்டனர்.

MyIMMs-ஐ ஊடுருவிய கும்பலால் வழங்கப்பட்ட அனைத்து PLKS அங்கீகாரங்களும் ரத்து செய்யப்படும் என ஸகாரியா ஏற்கெனவே கூறியிருந்தார்.