டெல்லியில் சம்பள தகராறு: முதலாளியை கத்தியால் குத்திய தொழிலாளி

புது டெல்லி – வடமேற்கு டெல்லியின் முகர்ஜி நகரில் திங்கட்கிழமை சம்பளப் பணம் தொடர்பான தகராறில் உணவகம் உரிமையாளர் ஒருவர் தமது தொழிலாளியால் கத்தியால் குத்தப்பட்டு பலத்த காயமடைந்தார்.

பாதிக்கப்பட்டவர் சோம்நாத் (45), அவரது தொழிலாளி விகாஸால் சமையலறைக் கத்தியைக் கொண்டு முகத்திலும் மார்பிலும் குத்தப்பட்டதாக காவல்துறை தெரிவித்தது. குற்றம் சாட்டப்பட்டவர் பின்னர் சம்பவ இடத்தில் இருந்து தப்பியோடினார்.

சோம்நாத், டாக்கா கிராமத்தில் ஒரு உணவகத்தை நடத்தி வருகிறார். விகாஸ், உத்தரப் பிரதேசத்தின் சித்தார்த் நகரைச் சேர்ந்தவர்.

உணவகம் ஒன்றில் சண்டை நடப்பதாக தகவல் கிடைத்ததையடுத்து நடத்தப்பட்ட விசாரணையில், சம்பளப் பணத் தகராறே சம்பவத்திற்குக் காரணம் என்பது தெரியவந்தது என வடமேற்கு மாவட்ட காவல்துறை துணை ஆணையர் அகாங்க்ஷா யாதவ் கூறினார்.

சந்தேக நபர் அந்த உணவகத்தில் ஏறக்குறைய இரண்டு மாதங்களாக வேலை செய்து வந்ததாக கூறப்படுகிறது.

காவல்துறையிடம் அளித்த வாக்குமூலத்தில், விகாஸுக்கு சம்பளத்தை ஏற்கெனவே வழங்கிவிட்டதாக பாதிக்கப்பட்டவர் கூறினார். எனினும், அந்தத் தொழிலாளி திங்கட்கிழமை மீண்டும் பணம் கேட்டுள்ளார்.

“வாக்குவாதத்தின்போது, விகாஸ் காய்கறி வெட்டும் கத்தியை எடுத்து சோம்நாத்தைத் தாக்கியதாகக் கூறப்படுகிறது. இதனால் அவரது முகத்திலும் மார்பிலும் காயம் ஏற்பட்டது.

“ஆபத்தான ஆயுதம் அல்லது வழிமுறையைப் பயன்படுத்தி வேண்டுமென்றே காயம் அல்லது கடுங்காயம் ஏற்படுத்துதல் மற்றும் தவறாக ஒருவரைத் தடுத்து வைத்தல் ஆகிய குற்றங்களுக்காக பாரதிய நியாய சன்ஹிதா (BNS) பிரிவு 118 மற்றும் 126 கீழ் வழக்குப் பதிவு செய்யப்பட்டுள்ளது. மேல் விசாரணை தொடர்கிறது,” என்று யாதவ் கூறினார்.

சந்தேக நபர் கைது செய்யப்பட்டாரா என்பது குறித்து காவல்துறை தெரிவிக்கவில்லை. – ஏஜென்சி