பாமாயில் உதிர்காய் சேகரிக்கும் தானியங்கி ரோபோவை உருவாக்கிய UPM மாணவர்

புத்ராஜெயா: மலேசிய புத்ரா பல்கலைக்கழகம் (UPM) பொறியியல் பீடத்தின் வேளாண் மற்றும் உயிரியல் அமைப்பு பொறியியல் இளநிலைப் பட்டப் படிப்பின் இறுதி ஆண்டு மாணவர் ஒருவர், பாமாயில் உதிர்காய் சேகரிப்புச் சிக்கலைத் தீர்க்கும் தானியங்கி ரோபோவை உருவாக்கியுள்ளார்.

இந்த ரோபோ, உதிர்ந்த பாமாயில் காய்களைத் தானாகவே கண்டறிந்து சேகரிக்கும் திறன் கொண்டது. இதன் மூலம் தோட்ட நடவடிக்கைகளின் செயல்திறன் அதிகரிப்பதோடு, தொழிலாளர் சார்பும் குறையும்.

அஹ்மாட் ஃபாரிஸ் அஹ்மாட் ஃபுவாட் கூறுகையில், பாமாயில் தொழிலில் பல பணிகள் இன்னும் கைமுறையாகவே செய்யப்படுவதால் அதிக தொழிலாளர்கள் தேவைப்படுகிறது; அந்தச் சவாலை எதிர்கொள்ளவே இந்தப் புத்தாக்கம் உருவாக்கப்பட்டது என்றார்.

"உதிர்காய்களைக் கைமுறையாகச் சேகரிக்கும்போது, தரையில் விழுந்த ஒவ்வொரு காயையும் தொழிலாளர்கள் எடுக்க வேண்டியிருக்கிறது. இது நேரத்தை விழுங்குவதோடு அதிக உடலுழைப்பையும் கோருகிறது," என்று அவர் ஓர் அறிக்கையில் தெரிவித்தார்.

மோட்டார் இயக்கச் சேகரிப்பு இயந்திரங்கள் ஏற்கெனவே சந்தையில் இருந்தாலும், அவற்றை இயக்க ஓர் ஆபரேட்டர் தேவைப்படுகிறது என்று அவர் விளக்கினார்.

"இந்த ஆய்வின் வழியாக, உதிர்காய்களைத் தானாகக் கண்டறியும் கணினிப் பார்வை (computer vision) அமைப்பை நான் உருவாக்கினேன்.

"ரோபோ தளம் ஆய்வகத்தில் ஏற்கெனவே இருந்தது; மனித உதவியை முழுமையாகச் சார்ந்திருக்காமல் ரோபோ சேகரிப்புப் பணியைச் செய்யும் வகையில் அந்தத் தொழில்நுட்பத்தை நான் இணைத்தேன்," என்றார்.

பாமாயில் துறை நாட்டுப் பொருளாதாரத்திற்கு முக்கிய பங்களிப்பாளராக இருப்பதால் அதையே ஆய்வுக்கு தேர்ந்தெடுத்ததாக அவர் கூறினார்.

"பாமாயில் தொழில் மலேசியாவுக்குப் பெரும் தாக்கத்தை ஏற்படுத்துகிறது. வேளாண் மற்றும் உயிரியல் அமைப்பு பொறியியல் மாணவனாக, இந்தத் துறையை நவீனப்படுத்தி எதிர்காலத்தில் பயன் தரும் தொழில்நுட்பத்தை உருவாக்க விரும்புகிறேன்," என்றார்.

வேளாண்மையை உயர் தொழில்நுட்பத் துறையாக இளையர்கள் பார்க்க வேண்டும் என்றும், அது புத்தாக்கத்திற்கும் நாட்டுப் பொருளாதாரப் பங்களிப்புக்கும் பெரும் வாய்ப்புகளை வழங்குகிறது என்றும் அவர் நம்பிக்கை தெரிவித்தார். (மேற்கோள்கள் மலாய் மொழியிலிருந்து மொழிபெயர்க்கப்பட்டவை.)