மின்னல் தாக்கி கால்பந்து வீரர் பலி; எண்மர் காயம்

நராத்திவாட் – சுங்கை கோலோக்கில் உள்ள சாந்திபாப் அரங்கில் நடைபெற்ற கோலோக் எஃப்ஏ கோப்பை 2026 அரையிறுதிப் போட்டியின்போது மின்னல் தாக்கியதில் ஒரு கால்பந்து வீரர் உயிரிழந்தார்; மேலும் எண்மர் காயமடைந்தனர்.

போட்டி நடந்துகொண்டிருந்த வேளையில் மைதானத்தில் மின்னல் தாக்கியதில் படுகாயமடைந்த சொஃப்வான் அவாய் (24), பின்னர் உயிரிழந்ததாக உறுதிப்படுத்தப்பட்டது.

கனமழை, மின்னலுடன் கூடிய புயல் மற்றும் பலத்த காற்று அந்தப் பகுதியைத் தாக்கிய நிலையில், போட்டியின் காயநேரத்தில் இச்சம்பவம் நிகழ்ந்தது. மேலும் எட்டு வீரர்கள் காயமடைந்தனர்.

பட்டானி எஃப்சி அணியின் முன்னாள் வீரரான சொஃப்வான், சமீபத்தில்தான் எஃப்சி யாலா அணியில் இணைந்திருந்தார்.

அவரது மறைவுச் செய்தியைத் தொடர்ந்து, எஃப்சி யாலா சமூக ஊடகம் வழியாக குடும்பத்தினருக்கு இரங்கல் தெரிவித்தது.

"எஃப்சி யாலாவின் புதிய வீரர் சொஃப்வான் அவாயின் குடும்பத்தினருக்கு எமது இரங்கலைத் தெரிவித்துக்கொள்கிறோம்," என்று அந்த அணி கூறியது.

கால்பந்து ரசிகர்கள் மற்றும் சமூக ஊடகப் பயனர்களும் இரங்கல் தெரிவித்தனர்.

கோலோக் எஃப்ஏ கோப்பை 2026 என்பது தாய்லாந்தின் தென் எல்லைப் பகுதி அணிகள் மற்றும் மலேசியக் கழகங்கள் பங்கேற்கும் ஒரு உள்ளூர் கால்பந்துப் போட்டியாகும்.

கோல்ஃப் மைதானத்திலும் இதுபோன்ற சம்பவம்

ஏறக்குறைய இதேபோன்ற சம்பவத்தில், பாங்கொக்கில் ஒரு கோல்ஃப் மைதானத்தில் புயல் மழையின்போது பணியில் இருந்த ஒரு கேடி மின்னல் தாக்கி உயிரிழந்தார்; மோசமான வானிலை இருந்தபோதும் வீரர்கள் விளையாட்டைத் தொடர்ந்தனர்.

அந்தத் துயரம், புயல் நேரத்தில் வீரர்கள் மற்றும் பணியாளர்களின் பாதுகாப்பு குறித்த கவலையை எழுப்பியது. ஆபத்தான நிலையில் விளையாட்டைத் தொடர்ந்த முடிவை பல சமூக ஊடகப் பயனர்கள் கேள்விக்குட்படுத்தினர்; பாதுகாப்புக் காரணங்களுக்காக விளையாட்டை நிறுத்த கேடிகளுக்கு அழுத்தம் இருந்ததாகவும் அவர்கள் குற்றம் சாட்டினர். – ஏஜென்சி