மின்னல் தாக்கி யாலா FC வீரர் பலி; காயமடைந்த 11 பேரில் மலேசியரும் ஒருவர்

சுங்கை கோலோக் – இங்குள்ள சாந்திபாப் அரங்கில் நேற்று மாலை நடைபெற்ற 2026 கோலோக் FA கோப்பை கால்பந்துப் போட்டியின் அரையிறுதியில் விளையாடிக் கொண்டிருந்தபோது மின்னல் தாக்கியதில் யாலா FC வீரர் ஒருவர் உயிரிழந்தார்.

உள்ளூர் நேரப்படி மாலை 5.30 மணியளவில் நிகழ்ந்த சம்பவத்தில், நாராதிவாட், வேங் மாவட்டத்தைச் சேர்ந்த சொஃப்வான் அவே (24) சம்பவ இடத்திலேயே உயிரிழந்ததாக உறுதி செய்யப்பட்டது.

இதில் மலேசியரான முகமட் அலிஃப் எஸ்ஸஹான் சுல்கிஃப்லி (22) காயமடைந்தார்.

தாய்லாந்து–மலேசிய கூட்டு அணிகளான சாம் கோல்ட் மற்றும் அபு நோங் சிரின் இடையே இப்போட்டி நடைபெற்றது.

மேலும் சோம்சாய் லோங்மிஹ்னா (25), சாகிரின் திகாசோம் (36), சகரியா கோலே (38), ஹமிருல் சே அசா (32), சரணந்த் சதவோர்ன் (37), மயுசரன் காசோ (31), ஃபாதெல் பாக்கா (19), சுஹைமி ரோஹ்மான் (28), அனாஸ் துல்யாசெரி மற்றும் கைரி லாயெங் ஆகியோரும் காயமடைந்தனர்.

சுங்கை கோலோக் மாவட்ட காவல்துறைத் தலைவர் தூன் சிரிகுன்ட் கூறுகையில், போட்டி நடந்துகொண்டிருந்தபோது அரங்கப் பகுதியில் கன மழையும் பலத்த காற்றும் வீசியதையடுத்து மைதான நடுவே மின்னல் தாக்கியது என ஆரம்பக் கட்ட விசாரணையில் தெரியவந்ததாகச் சொன்னார்.

அபு நோங் சிரின் அணிக்காக விளையாடிய சொஃப்வான் மின்னல் தாக்கி சரிந்து விழுந்ததாகவும், சுமார் 11 வீரர்கள் காயமடைந்ததாகவும் அவர் தெரிவித்தார்.

"சொஃப்வானின் சில நண்பர்கள் அவசர உதவி வழங்க முயன்றனர்; பின்னர் சுங்கை கோலோக் ஷெங் மு தார்ன் நம்ஜாய் அறக்கட்டளையின் அவசர மருத்துவப் பணியாளர்கள் வந்தபோதும் அவரைக் காப்பாற்ற முடியவில்லை.

"காயமடைந்த அனைவரும் சுங்கை கோலோக் மருத்துவமனையில் சிகிச்சைக்காக அனுப்பப்பட்டனர்," என்றார். (மலாய் மொழியிலிருந்து மொழிபெயர்க்கப்பட்ட மேற்கோள்.)

சாம் கோல்ட் அணிக்காக விளையாடிய முகமட் அலிஃப் எஸ்ஸஹான், மேல் சிகிச்சைக்காக மலேசியா திரும்ப முடிவு செய்ததாக தூன் கூறினார்.

தென் தாய்லாந்தின் பல்வேறு மாகாணங்கள் மற்றும் மலேசிய அணிகளுக்குத் திறந்த உள்ளூர் கால்பந்துப் போட்டி இது என்றும் அவர் குறிப்பிட்டார்.