கிரீஸில் இடிந்த பாலத்தில் இன்னும் ஊர்திகள் பயணம்

கிரீஸ்: 2023 முதல் அதிகாரப்பூர்வமாக இடிந்து, போக்குவரத்துக்கு மூடப்பட்ட ஒரு பாலத்தை, கிரீஸின் தெசாலி மாநிலத்தில் சில ஓட்டுநர்கள் இன்னும் பயன்படுத்தி வருகின்றனர்.

2023 செப்டம்பரில் அந்நாட்டைத் தாக்கிய டேனியல் புயலால் ஏற்பட்ட வேகமான நீரோட்டத்தையும் பெரும் வெள்ளத்தையும் தாங்க முடியாமல் பலையோபிர்கோஸ் பாலம் இடிந்தது.

புயலுக்குப் பின் தெசாலி மாநிலத்தில் சேதமடைந்த அல்லது பயன்படுத்த முடியாத நிலைக்குத் தள்ளப்பட்ட 79 பாலங்களில் இதுவும் ஒன்று. அந்தப் புயல் பிராந்தியத்தின் முக்கிய உள்கட்டமைப்புக்குப் பெரும் சேதத்தை ஏற்படுத்தியது.

டெம்பி நகராட்சி மற்றும் ஆஜியா நகராட்சியில் உள்ள ஆற்றங்கரை சமூகங்களை இணைக்கும் இந்தப் பாலம், உள்ளூர் மக்களுக்கு முக்கியமான பாதையாக இருந்தது.

எனினும், பாலத்தின் தற்போதைய நிலை கவலையளிக்கிறது. அது தளர்ந்து காணப்படுகிறது; அதன் நடுப்பகுதி பினியோஸ் ஆற்று நீர்மட்டத்திற்கு சில அங்குலங்கள் மேலே மட்டுமே உள்ளது.

தடுப்புகள் அமைக்கப்படவில்லை

2023 முதல் போக்குவரத்துக்கு மூடப்பட்டிருந்தாலும், பாலத்தில் தடுப்புகள் அமைக்கப்படவும் இல்லை, பழுது நீக்கப்படவும் இல்லை. இதனால், பாதுகாப்பு காரணங்களுக்காக வைக்கப்பட்ட எச்சரிக்கை அறிவிப்புப் பலகைகளைப் புறக்கணிப்பவர்கள் தொடர்ந்து அதைக் கடக்க முடிகிறது.

லரிசாநெட் டெய்லி நாளிதழ் பதிவு செய்த ட்ரோன் காட்சிகளில், ஒரு ஃபோர்ட் ரேஞ்சர் வாகனம் தடையோட்டப் பாதையைக் கடப்பது போல மெதுவாக இடிந்த பாலத்தைக் கடந்து, இறுதியில் மறுகரையை அடைவது காட்டப்படுகிறது.

உள்ளூர் மக்களின் கூற்றுப்படி, மாற்றுப் பாதைகள் மிக நீண்ட பயணத்தைக் கோருவதால், நேரமும் எரிபொருளும் அதிகம் செலவாகிறது; அதனால்தான் பல ஓட்டுநர்கள் ஆபத்தை ஏற்கத் தயாராகின்றனர்.

மேலும் கவலைக்குரியதாக, சுற்றுலாப் பயணிகளும் அடிக்கடி இந்த இடிந்த பாலத்தின் வழியே செல்லும்படி வழிகாட்டப்படுகிறார்கள் என்று தெரிவிக்கப்படுகிறது. எச்சரிக்கைப் பலகைகளைக் கண்டபின் அவர்கள் திரும்பிச் செல்ல வேண்டியிருக்கிறது, அல்லது ஆபத்தை ஏற்றுக் கடக்கிறார்கள். – ஏஜென்சி