சென்டூல் நீச்சல் குளத்தில் சிறுவர் மூழ்கி இறந்த வழக்கு: வீட்டுப் பணியாளருக்கு நான்காண்டு சிறை

சென்டூலில் உள்ள ஒரு குடியிருப்பின் நீச்சல் குளத்தில் சிறுவர் ஒருவர் மூழ்கி இறந்த வழக்கில், அலட்சியம் காட்டியதை ஒப்புக்கொண்ட வீட்டுப் பணியாளருக்கு நான்கு ஆண்டுகள் சிறைத்தண்டனை விதிக்கப்பட்டுள்ளது.

நீதிபதி சுஹைலா ஹாரோன் முன்னிலையில் 44 வயதான வாஹ்யுனி டன்ஜுங் குற்றத்தை ஒப்புக்கொண்டார் என சினார் ஹாரியான் செய்தி வெளியிட்டுள்ளது.

குற்றச்சாட்டின்படி, குழந்தையைப் பராமரிக்கும் பொறுப்பில் இருந்த குற்றம் சாட்டப்பட்டவர், ஜூலை 28 மாலை 6 மணி முதல் 7 மணிக்குள், சென்டூலில் உள்ள குடியிருப்பின் பெரியவர்களுக்கான நீச்சல் குளத்தில் அலட்சியம் காட்டி, பாதிக்கப்பட்டவரின் மரணத்திற்கு வழிவகுத்துள்ளார்.

2001ஆம் ஆண்டு குழந்தைகள் சட்டத்தின் பிரிவு 31(1)(a) கீழ் இந்தக் குற்றச்சாட்டு பதிவு செய்யப்பட்டது. குற்றம் நிரூபிக்கப்பட்டால் அதிகபட்சம் RM50,000 அபராதம் அல்லது 20 ஆண்டுகள் வரை சிறை அல்லது இரண்டும் விதிக்கப்படலாம்.

ஜூலை 29ஆம் தேதி கைது செய்யப்பட்ட நாளிலிருந்து தண்டனைக் காலம் கணக்கிடப்படும் என நீதிமன்றம் உத்தரவிட்டது.

பணியில் சேர்ந்து ஒரு மாதமே

வீட்டுப் பணியாளராக ஒரு மாதம் மட்டுமே பணியாற்றி வந்த குற்றம் சாட்டப்பட்டவர், பாதிக்கப்பட்டவரையும் அவரது ஐந்து வயது அண்ணனையும் எந்தவித நீச்சல் உதவிக் கருவியோ மிதவையோ இன்றி பெரியவர்களுக்கான குளத்திற்கு அழைத்துச் சென்றது விசாரணையில் தெரியவந்தது.

மேலும், கழிவறைக்குச் சென்றபோது இரு குழந்தைகளையும் கண்காணிப்பின்றி விட்டுச் சென்றுள்ளார்.

விசாரணையின்போது, துணை அரசுத் தரப்பு வழக்கறிஞர் எம்.டி. சுப்ரி ஹாஷிம், படிப்பினையாக அமையும் வகையில் தகுந்த தண்டனை வழங்குமாறு நீதிமன்றத்தைக் கோரினார்.

குழந்தைகளைப் பராமரிக்கும் பொறுப்பு ஒப்படைக்கப்பட்டிருந்த குற்றம் சாட்டப்பட்டவர், பாதிக்கப்பட்டவரை சிறுவயது அண்ணனுடன் கண்காணிப்பின்றி தனியே விட்டிருக்கக் கூடாது என்றார்.

வழக்கு நடவடிக்கைகளின்போது வாஹ்யுனிக்கு வழக்கறிஞர் யாரும் ஆஜராகவில்லை.