தாய் அடிக்கடி கண்டித்ததால் குடும்ப வீட்டைக் கொழுத்திய 22 வயது இளைஞர்

ஜகார்த்தா – மேற்கு ஜாவா மாநிலம், பாண்டுங் நகரின் ஜாலான் சிராங்ராங்கில் உள்ள தனது குடும்ப வீட்டை 22 வயது இளைஞர் ஒருவர் தீ வைத்து அழித்ததாக CNN இந்தோனேசியா செய்தி நிறுவனம் தெரிவித்துள்ளது. தாயார் அடிக்கடி கண்டித்ததே இதற்குக் காரணம் எனக் கூறப்படுகிறது.

நேற்று முன்தினம் உள்ளூர் நேரம் பிற்பகல் சுமார் 1 மணியளவில் நிகழ்ந்த இச்சம்பவத்தில், தீ வேகமாகப் பரவியதால் அடுத்திருந்த இரு அண்டை வீடுகளும் முழுமையாக அழிந்தன.

உள்ளூர் காவல்துறைத் தலைவர் குர்னியாவான் கூறுகையில், AR என்று மட்டுமே அறியப்படும் சந்தேக நபர், சம்பவத்திற்கு முன் தாயாரால் கண்டிக்கப்பட்டதால் உணர்ச்சிவசப்பட்டு இவ்வாறு செயல்பட்டதாக முதற்கட்ட விசாரணையில் தெரியவந்துள்ளது.

"பெற்றோரால் அடிக்கடி கண்டிக்கப்பட்டதால் ஏற்பட்ட மனவருத்தமே முக்கிய காரணமாகக் கருதப்படுகிறது. குறிப்பாக, சந்தேக நபர் சமீபத்தில் தனது மனைவியை விவாகரத்து செய்த பின்னர்," என்று அவர் கூறினார் (இந்தோனேசிய மொழியிலிருந்து மொழிபெயர்க்கப்பட்டது).

வீட்டுக்குள் நிறுத்தப்பட்டிருந்த மோட்டார்சைக்கிளுக்குச் சந்தேக நபர் தீ வைத்ததாகக் காவல்துறை தெரிவித்தது. பின்னர் தீ பரவி, வீட்டின் முழு அமைப்பும் அருகிலுள்ள வீடுகளும் அழிந்தன.

உயிரிழப்பு ஏதும் இல்லை என்றாலும், தப்பிக்க முயன்ற சந்தேக நபரின் தந்தை கைகளில் தீக்காயம் அடைந்தார்.

சம்பவ இடத்திற்கு வந்த காவல்துறை சந்தேக நபரைக் கைது செய்து, எரிந்த மோட்டார்சைக்கிள் மற்றும் இரண்டு எரிவாயு லைட்டர்களைச் சாட்சியப் பொருட்களாகக் கைப்பற்றியது. – ஏஜென்சி