மேற்குக் கரையில் பாலஸ்தீனக் கிராமம் மீது குடியேற்றவாசிகள் தாக்குதல்; ஐவர் காயம்

ரமல்லா – ஆக்கிரமிக்கப்பட்ட மேற்குக் கரையில் உள்ள ஒரு சிறிய பாலஸ்தீனக் குடியிருப்பின் மீது இஸ்ரேலியக் குடியேற்றவாசிகள் குழு ஒன்று தாக்குதல் நடத்தி, சில குடியிருப்பாளர்களைக் காயப்படுத்தியதுடன், வீடுகளை அழித்து மின்சார ஆதாரத்தையும் சேதப்படுத்தியுள்ளது என ராணுவமும் குடியிருப்பாளர்களும் வியாழக்கிழமை தெரிவித்தனர்.

தொலைதூரக் கிராமமான கிர்பெட் அல்-துபாவில் இருந்த ஏஎஃப்பி செய்தியாளர்கள், புகையாலும் தீயாலும் கட்டடங்கள் கருமையாகி இருந்ததாகவும், மூன்று வீடுகளின் உட்பகுதி முற்றிலும் எரிந்து சாம்பலானதாகவும், சுவர்களில் ஹீப்ரு மொழியில் கிறுக்கல்கள் இருந்ததாகவும் தெரிவித்தனர்.

வீடுகளுக்கு அப்பால், அந்தத் தொலைதூரச் சமூகத்தின் முதன்மை மின்சார ஆதாரமான சுமார் பன்னிரெண்டு சூரிய மின் தகடுகளும் பயன்படுத்த முடியாத அளவுக்குச் சேதப்படுத்தப்பட்டன.

இஸ்ரேலிய ராணுவம் தனது அறிக்கையில் இந்தத் தாக்குதலைக் கடுமையாகக் கண்டித்ததுடன், புதன்கிழமை நள்ளிரவில் நிகழ்ந்த சம்பவத்தில் ஒரு பெண் மற்றும் ஒரு சிறுமி உட்பட பல பாலஸ்தீனர்கள் காயமடைந்ததை உறுதிப்படுத்தியது.

எனினும், பாதுகாப்புப் படையினர் வருவதற்கு முன்பே சந்தேக நபர்கள் தப்பியோடிவிட்டதாக ராணுவம் கூறியது. தாக்குதலில் ஐந்து பேர் காயமடைந்ததை உள்ளூர் மக்கள் உறுதிப்படுத்தினர்.

எரிக்கப்பட்ட வீட்டின் உரிமையாளர்களில் ஒருவரான ரத்வான் அபு ஜுந்தி, சுமார் 40 குடியேற்றவாசிகள் உள்ளூர் நேரம் இரவு 10 மணிக்குக் கல்லெறிந்தபடி கிராமத்தைத் தாக்கியதாகவும், பின்னர் தனது மனைவியையும் மகளையும் தாக்கி வீட்டின் ஓர் அறையைத் தீ வைத்ததாகவும் தெரிவித்தார்.

சுமார் 100 பேர் வசிக்கும் கிர்பெட் அல்-துபா, மசாஃபர் யாட்டா பகுதியில் அமைந்துள்ளது. அங்குள்ள பாலஸ்தீன கால்நடை வளர்ப்புச் சமூகங்கள் அடிக்கடி குடியேற்றவாசிகளின் வன்முறையையும், இஸ்ரேலிய ராணுவத்தின் வீடு இடிப்பையும் எதிர்கொள்கின்றன.

விசாரணை நடத்தப்படும் என இஸ்ரேலிய ராணுவம் கூறியது. எனினும், இத்தகைய விசாரணைகள் அரிதாகவே வழக்குத் தொடுப்பில் முடிகின்றன என பாலஸ்தீனர்களும் மனித உரிமை அமைப்புகளும் கூறுகின்றன. – ஏஜென்சி