ஹாங்காங் பாடலாசிரியர் பீட்டர் லாய் தமது 76ஆவது வயதில் காலமானார்

ஹாங்காங்கின் மூத்த கான்டோபாப் பாடலாசிரியர் பீட்டர் லாய், தமது 76ஆவது வயதில் காலமானார்.

இந்த ஆண்டு பக்கவாதத்தால் பாதிக்கப்பட்டு மருத்துவமனையில் அனுமதிக்கப்பட்ட லாய், புதன்கிழமை காலை உயிரிழந்தார் என அவரது மகனும் நெடுங்கால நண்பர் ஒருவரும் செய்தியாளர் சந்திப்பில் தெரிவித்தனர்.

"தி லிரிக்கல் மேவரிக்" என்று செல்லமாக அழைக்கப்பட்ட லாய், 1984ஆம் ஆண்டு பெரும் நட்சத்திரம் லெஸ்லி சியுங் பாடிய "மொனிக்கா" உள்ளிட்ட வெற்றிப் பாடல்களுக்கு வரிகள் எழுதினார். அது ஹாங்காங் பாப் இசையின் மிகவும் பிரபலமான பாடல்களில் ஒன்றாகக் கருதப்படுகிறது.

அவரது பாடல் வரிகள், சாம் ஹுய் மற்றும் அனிடா முய் உள்ளிட்ட அந்தத் தலைமுறையின் கான்டோபாப் நட்சத்திரங்களின் மகத்தான வெற்றிக்கும் பங்களித்தன.

"ஹாங்காங் கான்டோபாப் உலகுக்கு எண்ணற்ற சிறந்த படைப்புகளை உருவாக்கியதற்கு நன்றி," என ஹுய் தமது இரங்கல் குறிப்பில் எழுதினார். (மொழிபெயர்ப்பு)

"உங்கள் வரிகள் எளிமையானவை, ஆனால் ஒருபோதும் ஆபாசமானவை அல்ல," என்றும் அவர் கூறினார்.

பல பத்தாண்டுகள் நீண்ட லாயின் பயணம் 1970 மற்றும் 1980களில் உச்சத்தை எட்டியது. ஜேம்ஸ் வோங், ஜிம்மி லோ ஆகியோருடன் அவரும் ஹாங்காங்கின் முதல் தலைமுறை கான்டோபாப் பாடலாசிரியர்களில் ஒருவராக இருந்தார்.

ஹாங்காங்கின் பொருளாதார வளர்ச்சிக் காலத்தில் உழைக்கும் வர்க்கத்தின் அன்றாட வாழ்க்கையிலிருந்து உத்வேகம் பெற்ற அவரது படைப்புகள், அடிமட்ட மக்களுடன் நெருக்கம் மற்றும் நகைச்சுவைக்காகப் பெயர் பெற்றன.

அவரது மறைவு சமூக ஊடகங்களில் இரங்கல் மழையைத் தூண்டியது.

"உங்கள் இடத்தை யார் நிரப்ப முடியும்?" என ஒரு பயனர், "மொனிக்கா" பாடலின் புகழ்பெற்ற வரியைச் சுட்டிக்காட்டி எழுதினார்.

"மிக்க நன்றி, பீட்டர்," என மற்றொருவர் பதிவிட்டார்.