பள்ளி முன் சிவப்பு விளக்கை மீறிய L உரிம ஓட்டுநர்: மக்கள் கூட்டாக JPJ-க்கு புகார்

பெட்டாலிங் ஜெயா – ஒரு பள்ளிக்கு முன்பாக சிவப்பு விளக்கை மீறிச் சென்றதாகக் கூறப்படும் L (பயிற்சி) உரிமம் கொண்ட மோட்டார்சைக்கிள் ஓட்டுநரின் செயல் மக்களின் கோபத்தைத் தூண்டியுள்ளதுடன், சாலைப் போக்குவரத்துத் துறைக்கு (JPJ) கூட்டாகப் புகார் அளிக்கும் நடவடிக்கைக்கும் வழிவகுத்துள்ளது.

இச்சம்பவம் நேற்று பிற்பகல் 3.50 மணியளவில் SK Seri Budiman பள்ளி முன் நிகழ்ந்ததாகக் கூறப்படுகிறது. Threads பயனர் @Wan_muliani பகிர்ந்த காணொளி பரவலானது. அதில், சிவப்பு விளக்கு எரிந்தும், மாணவர்கள் கடந்து செல்ல மற்ற வாகனங்கள் நின்றிருந்தும் அந்த மோட்டார்சைக்கிள் தொடர்ந்து சென்றதாகக் காட்டப்படுகிறது.

"நான் என் குழந்தை பள்ளியிலிருந்து திரும்புவதைப் படம்பிடித்துக் கொண்டிருந்தேன். திடீரென ஒரு மோட்டார்சைக்கிள் சிவப்பு விளக்கிலும் வேகமாகப் பாய்ந்து சென்றது. மற்ற ஓட்டுநர்கள் அனைவரும் நின்றுவிட்டனர். அந்த ஓட்டுநர் இன்னும் L உரிமம் கொண்டவர். சம்பந்தப்பட்ட தரப்பினர் இந்த மோட்டார்சைக்கிள் மீது கவனம் செலுத்த வேண்டும்," என்று அவர் கூறினார். (மலாய் மொழியிலிருந்து மொழிபெயர்க்கப்பட்டது)

கருத்துப் பகுதியில், MyJPJ செயலி வழியாக JPJ-க்குப் புகார் அளித்ததற்கான திரைப்பிடிப்புகளை பலர் பதிவேற்றினர்.

"நான் புகார் அளித்துவிட்டேன். சம்பந்தப்பட்டவரின் உரிமம் ரத்து செய்யப்பட வேண்டும்," என @Chaaaachaaaaaaa_ கூறினார்.

"புகார் அனுப்பப்பட்டது. இது அனைத்து சாலைப் பயனர்களுக்கும் பாடமாக அமைய வேண்டும்," என @Ainulsenan தெரிவித்தார்.

@Farid_nor85, ஓட்டுநர் மீது கடும் நடவடிக்கை எடுக்குமாறு JPJ-ஐ வலியுறுத்தினார். "அவரது உரிமத்தை ரத்து செய்யுங்கள்; இப்படிப்பட்டவர்கள் சமூகத்திற்குப் பல பிரச்னைகளைக் கொண்டுவருவார்கள்," என்றார்.

மற்றொரு பயனர் @Nasrullahazli, சம்பவ விவரங்கள் முழுமையாகப் பகிரப்பட்டுள்ளதால் MyJPJ செயலி வழியாகப் புகார் அளிக்குமாறு மக்களை ஊக்குவித்தார்.