ரிம6.75 கோடி கட்டணத்தை ஒத்திவைக்கும் ரோஸ்மா மனு: ஆக 12இல் தீர்ப்பு

கோலாலம்பூர் – லெபனான் நகைக் கம்பெனியான குளோபல் ரோயல்டி டிரேடிங் SAL நிறுவனத்துக்கு ரிம6.75 கோடி (RM67.5 மில்லியன்) செலுத்துவதை ஒத்திவைக்கக் கோரி டத்தின் ஸ்ரீ ரோஸ்மா மன்சூர் தாக்கல் செய்த மனுவுக்கு ஆகஸ்ட் 12ஆம் தேதி தீர்ப்பளிக்க இங்குள்ள உயர்நீதிமன்றம் தேதி குறித்துள்ளது.

இரு தரப்பு வாதங்களைக் கேட்ட பின்னர் நீதிக் கமிஷனர் Marianne Antoinette Ghani இத்தேதியை நிர்ணயித்தார்.

இன்றைய விசாரணையில் ரோஸ்மா சார்பில் வழக்கறிஞர் Reza Rahim ஆஜரானார்; நகைக் கம்பெனி சார்பில் வழக்கறிஞர் Venothani Raja Gopal ஆஜரானார்.

முன்னாள் பிரதமரின் மனைவியிடம் கடனாக வழங்கப்பட்டதாகக் கூறப்படும் 43 நகைப் பொருள்கள் காணாமல் போன வழக்கில், கடந்த ஜூன் 10ஆம் தேதி ரிம6.75 கோடியை குளோபல் ரோயல்டிக்குச் செலுத்த ரோஸ்மாவுக்கு உத்தரவிடப்பட்டது.

வாதியான கம்பெனி, 75 வயதான ரோஸ்மாவுக்கு எதிராகத் தாக்கல் செய்த வழக்கை அனுமதித்த பின்னர் நீதிபதி டத்தோ Quay Chew Soon இந்த முடிவை வழங்கினார்.

தீர்ப்பு நாளிலிருந்து ஒரு மாதத்துக்குள் இழப்பீட்டைச் செலுத்த வேண்டும் என்றும், ரிம150,000 செலவுத் தொகையில் ரிம75,000 வாதிக்கும், ரிம75,000 மூன்றாம் தரப்புக்கும் வழங்க வேண்டும் என்றும் நீதிமன்றம் உத்தரவிட்டது.

நகைகளைத் திருப்பி அளிக்கத் தவறியது அலட்சியத்துக்கான சான்று என்றும், 43 நகைகளும் பறிமுதல் செய்யப்பட்டதாக ரோஸ்மா நிரூபிக்கத் தவறினார் என்றும் நீதிபதி கூறினார்.

2018ஆம் ஆண்டு 1MDB நிதி ஊழல் விசாரணை தொடர்பான காவல்துறைச் சோதனையின்போது நகைகள் பறிமுதல் செய்யப்பட்டதாகக் கூறி, மூன்றாம் தரப்பான நாட்டின் காவல்துறைத் தலைவர் மற்றும் அரசாங்கத்துக்கு எதிராக ரோஸ்மா தொடுத்த கோரிக்கையையும் நீதிபதி தள்ளுபடி செய்தார்.

நகைகள் பார்வைக்காக வழங்கப்பட்டவை என்றும், அது ஒரு கன்சைன்மென்ட் ஏற்பாடு என்றும் ரோஸ்மா வாதிட்டதாக நீதிபதி குறிப்பிட்டார். அவற்றை வாங்க வேண்டிய கடமை தமக்கு இல்லை என்றும், அவை தமக்குச் சொந்தமானவை அல்ல, அதிகாரிகளால் பறிமுதல் செய்யப்பட்டவை என்றும் அவர் கூறியிருந்தார்.

கன்சைன்மென்ட் ஆவணத்தின் நம்பகத்தன்மை முந்தைய நடவடிக்கைகளில் ஒருபோதும் மறுக்கப்படவில்லை; மாறாக ரோஸ்மாவே அதைத் தமது வாதத்தின் ஒரு பகுதியாகப் பயன்படுத்தினார் என நீதிபதி கூறினார்.

40க்கும் மேற்பட்ட நகைகள் காணாமல் போனது தொடர்பாக 1.457 கோடி அமெரிக்க டாலர் வழக்கை குளோபல் ரோயல்டி தொடுத்திருந்தது.

ஏப்ரல் 13ஆம் தேதி விசாரணையின் முதல் நாளில், நிறுவனர் Samer Hassim Halimeh வாதி சாட்சியாகவும், பின்னர் ரோஸ்மா பிரதிவாதியாகவும் சாட்சியம் அளித்தனர்.

நகைகளைத் திருப்பி அளிக்க மறுத்தது அல்லது அலட்சியம் காட்டியது இல்லை என ரோஸ்மா மறுத்தார்; கேட்கப்படும்போது அசல் நிலையில் திருப்பி அளிக்கும் நோக்கத்துடன் கவனமாகப் பாதுகாத்ததாகக் கூறினார்.