இந்தோனேசியாவில் ரப்பர் விட்டு எண்ணெய்ப் பனைக்கு மாறும் விவசாயிகள்

உலகின் இரண்டாவது பெரிய ரப்பர் விநியோகஸ்தரான இந்தோனேசியாவில் — உலக உற்பத்தியில் 14% பங்கு — விவசாயிகள் பெருமளவில் ரப்பரைக் கைவிட்டு எண்ணெய்ப் பனை பயிரிடத் திரும்புகின்றனர். வாகனத் தொழில் முதல் சுகாதாரம் வரை பயன்படும் இப்பொருளின் உலகளாவிய விநியோகம் இதனால் இறுக்கமடையக்கூடும்.

வேளாண் அமைச்சின் தரவுப்படி, ரப்பர் தோட்டப் பரப்பு ஐந்தாண்டுகளில் 17% குறைந்து, 2021இல் இருந்த 37.8 லட்சம் ஹெக்டேரிலிருந்து 2026இல் 31.3 லட்சம் ஹெக்டேராகக் குறைந்துள்ளது. உற்பத்தி 2021இல் 30 லட்சம் மெட்ரிக் டன்னுக்கு மேல் இருந்தது; இவ்வாண்டு 20 லட்சம் டன்னாகக் கணிக்கப்படுகிறது.

"அறுவடை மாதம் இருமுறை; புதிய பழக்குலைகளை விற்று பணம் கிடைக்கிறது. ரப்பரைப் போல தினமும் கண்காணிக்க வேண்டியதில்லை," என தெற்கு சுமத்ராவின் பன்யுஆசின் மாவட்டத்தில் உள்ள தனது தோட்டத்திலிருந்து சுமார்யோனோ ராய்ட்டர்ஸிடம் தொலைபேசியில் கூறினார். (மொழிபெயர்ப்பு)

ரப்பர் மரங்கள் வருவாய் தர ஐந்து முதல் ஏழு ஆண்டுகள் ஆகும்; ஒருநாள் விட்டு ஒருநாள் பால் எடுக்க வேண்டும் — திறமையான தொழிலாளர்கள் குறைந்து வருவதால் இது சவாலாகியுள்ளது என Rubber Services Singapore 1877 இயக்குநர் கெவன் மிட்செல் கூறினார்.

அப்கரிந்தோ ரப்பர் விவசாயிகள் சங்கத் தலைவர் ஆரிஃப் சுசாந்தோ கூறுகையில், தெற்கு சுமத்ராவில் மட்டும் 5 லட்சம் ஹெக்டேர் வரை ஏற்கெனவே எண்ணெய்ப் பனைக்கு மாறியிருக்கலாம். "முக்கிய காரணம் எளிது: விலை," என்றார்.

2011இல் உச்சத்தைத் தொட்ட பின் ரப்பர் விலை நீண்டகால சரிவைச் சந்தித்தது. பனை எண்ணெய் விலை கொள்ளைநோய்க் காலத்தில் சாதனை உயர்வைக் கண்டு, தற்போது உயிரி எரிபொருள் கொள்கைகளால் ஆதரவு பெறுகிறது.

நான்கு பத்தாண்டுகள் ரப்பர் பயிரிட்ட 63 வயது கஸ்தோலானி, கடந்த இரண்டாண்டுகளில் தனது 11 ஹெக்டேரில் ஏழை மாற்றிவிட்டார். இந்தோனேசியா உலகின் மிகப்பெரிய பனை எண்ணெய் உற்பத்தியாளர்; இத்தொழில் நாட்டின் ஏற்றுமதியில் 8.3%, மொத்த உள்நாட்டு உற்பத்தியில் 3.5% பங்கு வகிக்கிறது.

அரசு ரப்பர் துறையின் போட்டித்திறனை உயர்த்த முயல்வதாகவும், மாற்றத்தின் நீண்டகால விளைவுகளைக் கருத்தில் கொள்ளுமாறு விவசாயிகளைக் கேட்டுக்கொள்வதாகவும் தோட்டப் பயிர்கள் இயக்குநரகப் பொதுச்செயலர் ஹேரு திரி விடார்தோ கூறினார்.

இந்தோனேசியாவின் இயற்கை ரப்பரில் சுமார் 50% டயர் தொழிலுக்குப் பயன்படுகிறது. ஹெலிக்ஸ்டாப் தலைமை நிர்வாகி ஃபாரா மில்லர் கூறுகையில், இந்தோனேசிய SIR20 சமீப வாரங்களில் தாய்லாந்தின் STR20-க்கு இணையாக அல்லது அதிக விலையில் வர்த்தகமாகியுள்ளது. மேற்கு ஆப்பிரிக்கா, குறிப்பாக ஐவரி கோஸ்ட், சில பங்கை நிரப்பியுள்ளது.