மொஜ்தபாவுடன் தொடர்பு கொள்வது 'தற்போது மிகக் கடினம்': ஈரான் அதிபர்

ஈரானின் புதிய உயர் தலைவர் மொஜ்தபா கமேனியுடன் தொடர்பு கொள்வது "தற்போது மிகக் கடினமாக" உள்ளது என அந்நாட்டு அதிபர் மசூத் பெசெஷ்கியான் தெரிவித்தார். எனினும், அவரது இருப்பு ஈரானியத் தலைமைக்குப் பெரும் பலத்தை அளிக்கிறது என்றும் அவர் வலியுறுத்தினார்.

"தற்போது அவருடன் தொடர்பு கொள்வது மிகக் கடினம். ஆனால் எப்படியிருந்தாலும், நாங்கள் தொடர்ந்து செயல்பட முடியும் வகையில் அவரது இருப்பு எங்களுக்கு மிகப் பெரிய பலமாக உள்ளது," என்று பெசெஷ்கியான் கூறினார்.

மேற்காசியப் போரைத் தொடங்கிய அமெரிக்க-இஸ்ரேலியத் தாக்குதலில் கமேனி காயமடைந்தார். அதே தாக்குதலில் கொல்லப்பட்ட தமது தந்தைக்குப் பின் பொறுப்பேற்றதிலிருந்து அவர் பொது இடங்களில் தோன்றவில்லை.

இளம் கமேனி இதுவரை எழுத்துப்பூர்வ அறிக்கைகள் வழியாகவே தொடர்பு கொண்டுள்ளார். ஈரான் அமெரிக்காவுடன் மோதலில் இருக்கும் இந்நேரத்தில் அவரது வெளிப்படையற்ற நிலை, பிற உயர் அதிகாரிகளுடனான அவரது உறவுகள் குறித்த ஊகங்களைத் தூண்டியுள்ளது.

குறிப்பாக, கடந்த மாதம் நடைபெற்ற தமது தந்தையின் இறுதிச் சடங்குகளில் அவர் கலந்துகொள்ளவில்லை.

எனினும், தமது தலைவரை ஆதரித்துப் பேசிய பெசெஷ்கியான், அவருடன் பயனுள்ள சந்திப்புகளை நடத்த முடிந்தது என்றும், "கருணையும் மிக ஆரோக்கியமான தர்க்கமும்" கொண்டு தாம் வரவேற்கப்பட்டதாகவும் கூறினார்.

"துரதிர்ஷ்டவசமாக, தற்போதைய நிலை சில தீய நோக்கம் கொண்டவர்கள் அவரை வேறு விதமாக விவரிக்கவும், வேறு ஒரு தோற்றத்தை முன்வைக்கவும் இடமளிக்கிறது," என்றார்.

ஈரானின் அதிகார அமைப்பில் மிக உயர்ந்த பதவியை ஏற்றதிலிருந்து கமேனி பொது வெளியில் தோன்றாதது கவனத்தை ஈர்த்து வருகிறது. டெஹ்ரான்-வாஷிங்டன் இடையே பதற்றம் நீடிக்கும் நிலையில், புதிய உயர் தலைவரின் நிலை குறித்து ஓர் உயர் ஈரானிய அதிகாரி வெளிப்படையாக அளித்த கருத்துகளில் இது முக்கியமானது.