ABIM சமூகப் போராட்டத்தின் தீபமாகத் தொடர வேண்டும்: பிரதமர்

பெட்டாலிங் ஜெயா – மலேசிய இஸ்லாமிய இளைஞர் இயக்கம் (ABIM) தனது 55ஆம் ஆண்டு நிறைவைக் கொண்டாடும் வேளையில், தஃவா, கல்வி மற்றும் மனிதாபிமான விழுமியங்களை உறுதியாகப் பற்றிக்கொண்டு, சமூகப் போராட்டத்தின் தீபமாக அது தொடர்ந்து இருக்க வேண்டும் என பிரதமர் டத்தோ ஸ்ரீ அன்வார் இப்ராஹிம் நம்பிக்கை தெரிவித்தார்.

இன்று முகநூலில் வெளியிட்ட பதிவில், ABIM வெறும் ஒரு இஸ்லாமிய இளைஞர் அமைப்பு மட்டுமல்ல; ஹரகா இஸ்லாமியா என்ற தன்னிலை கொண்ட மாணவர் மற்றும் தஃவா இயக்கம் என்று அவர் குறிப்பிட்டார்.

"55 வயது என்பது வெறும் ஆண்டுகளின் கணக்கு அல்ல; தியாகம், ஒழுக்கம், நற்பண்பு மற்றும் நம்பிக்கையால் எழுதப்பட்ட போராட்டக் கோடு," என்று அவர் கூறினார் (மலாய் மொழியிலிருந்து மொழிபெயர்க்கப்பட்டது).

தஃவாவின் குரல் மேடைப் பேச்சை விட மேலானது என்று அன்வார் வர்ணித்தார்.

"தஃவாவின் குரல் வெறும் மேடைக் குரல் அல்ல; அது சமூகத்திற்கு உயிர் தரும் துடிப்பு; ஒடுக்கப்பட்டோரைக் (mustadh'afin) கவனித்து, தலைமுறைகளுக்குக் கல்வி அளித்து, மனித கண்ணியத்தை உயர்த்தி, குழப்பத்தால் இருள் சூழ்ந்த காலத்தில் போராட்டத் தீபத்தை ஏற்றுவது," என்றார்.

55ஆம் ஆண்டில், விழுமியங்களை உறுதியாகப் பிடித்த வேர்களுடன், புயலைத் தாங்கி நிற்கும், சமூகத்திற்கு நிழல் தரும் கிளைகளுடன் கூடிய மரமாக ABIM தொடர வேண்டும் என அவர் கூறினார்.

"ABIM-க்கு 55ஆம் ஆண்டு நிறைவு வாழ்த்துகள்," என்று அவர் கூறினார். – KOSMO! ONLINE