தேர்தல் முறை குறித்த வாக்கெடுப்புக்கு நியூசிலாந்து பிரதமர் லக்ஸன் திறந்த மனது

நியூசிலாந்து பிரதமர் கிறிஸ்டோபர் லக்ஸன், தமது நாட்டின் தேர்தல் முறை குறித்து பொது வாக்கெடுப்பு நடத்துவதற்குத் தாம் திறந்த மனதுடன் இருப்பதாகக் கூறினார். நவம்பர் 7ஆம் தேதி நடைபெறவுள்ள பொதுத் தேர்தலுக்குப் பிறகு அவர் மீண்டும் ஆட்சிக்கு வந்தால், அத்தகைய வாக்கெடுப்பு 2027இலேயே நடத்தப்படலாம்.

Newstalk ZB வானொலிக்கு அளித்த பேட்டியில், கலப்பு விகிதாசார பிரதிநிதித்துவ (MMP) முறை குறித்த வாக்கெடுப்பு "நாம் பரிசீலிக்க வேண்டிய ஒன்று" என்று அவர் கூறினார்.

"நான் அதை ஆதரிப்பேன் என்று நினைக்கிறேன்; ஏனெனில் அரசியலமைப்பு அளவில் ஒருமுறை மீளாய்வு செய்து, 'நியூசிலாந்தே, இதுதான் நீங்கள் இன்னும் விரும்பும் முறையா?' என்று கேட்பது முற்றிலும் சரியானது என்று கருதுகிறேன்," என்றார். (மொழிபெயர்ப்பு)

1996 முதல் ஜெர்மன் பாணி முறை

பிரிட்டனிடமிருந்து பெறப்பட்ட முந்தைய first-past-the-post முறையின் கீழ் சிறிய கட்சிகள் நாடாளுமன்றத்திற்கு வர முடியாமல் தடுக்கப்படுகின்றன என்று ஒரு விசாரணை கண்டறிந்ததை அடுத்து, நியூசிலாந்து 1996இல் ஜெர்மன் பாணி MMP முறையை ஏற்றுக்கொண்டது.

MMP முறையின் கீழ் வாக்காளர்கள் இரு வாக்குகளை அளிக்கிறார்கள்: ஒன்று உள்ளூர் வேட்பாளருக்கு, மற்றொன்று கட்சிக்கு.

வெற்றி பெறும் உள்ளூர் வேட்பாளர்கள் தமது இடங்களைத் தாமாகவே பெறுகின்றனர்; மேலும் 48 இடங்கள், ஒவ்வொரு கட்சியும் நாடு முழுவதும் பெற்ற வாக்கு விகிதத்திற்கு ஏற்ப கட்சிப் பட்டியலிலிருந்து நிரப்பப்படுகின்றன.

பாராட்டும் விமர்சனமும்

சிறிய கட்சிகளுக்கு அரசாங்கத்தில் குரல் கொடுக்க வாய்ப்பு அளிப்பதற்காக இந்த முறை பாராட்டப்படுகிறது. ஆனால் அதன் சிக்கல் தன்மைக்காகவும், அடிக்கடி கூட்டணி அரசாங்கங்களை உருவாக்க வேண்டிய நிலைக்கு வழிவகுப்பதற்காகவும் விமர்சிக்கப்படுகிறது.

பூர்வகுடி மாவோரி வாக்காளர்களுக்கு மட்டுமே ஒதுக்கப்பட்ட ஏழு இடங்கள் உட்பட, சில தனித்துவமான அம்சங்களும் இந்த முறையில் உள்ளன.