பத்து பகாட் ஆற்றில் சடலம்: இருவரை கைது செய்த ஜொகூர் காவல்துறை

பத்து பகாட்டில் ஓர் ஆற்றில் ஆண் ஒருவரின் சடலம் கண்டெடுக்கப்பட்டதைத் தொடர்ந்து, கொலையைத் திட்டமிட்டவர் உட்பட இரு ஆடவர்களை ஜொகூர் காவல்துறை கைது செய்துள்ளது.

ஜொகூர் காவல்துறைத் துணைத் தலைவர் ஹூ சுவான் ஹுவாட், இருவரும் மாநிலத்தின் வெவ்வேறு இடங்களில் கைது செய்யப்பட்டனர் என்றார்.

சந்தேக நபர்களில் ஒருவர் பலியானவருக்குச் செலுத்த வேண்டிய கடன் காரணமாக இக்கொலை நிகழ்ந்திருக்கலாம் என ஆரம்ப விசாரணையில் தெரியவந்துள்ளது என அவர் கூறினார்.

“கடன் தொகை எவ்வளவு என்பது இன்னும் விசாரிக்கப்பட்டு வருகிறது,” என ஜொகூர் காவல்துறைத் தலைமையகத்தில் இன்று அவர் கூறியதாக பர்னாமா செய்தி நிறுவனம் தெரிவித்தது.

வேறு சந்தேக நபர்கள் இந்த வழக்கில் தொடர்புடையவர்களா என்பதையும் காவல்துறை உறுதிப்படுத்தி வருகிறது என ஹூ கூறினார்.

தண்டனைச் சட்டத்தின் பிரிவு 302இன் கீழ் கொலை வழக்கு விசாரணைக்கு உதவும் வகையில், இருவரும் இன்று முதல் ஆகஸ்ட் 10 வரை ஆறு நாள்கள் தடுப்புக்காவலில் வைக்கப்பட்டுள்ளனர்.

பலியானவரின் கைகளும் கால்களும் ஒட்டும் நாடாவால் கட்டப்பட்ட நிலையில் சடலம் கண்டெடுக்கப்பட்டது; இடுப்பு மற்றும் கைகளில் பல காயங்கள் இருந்தன என அவர் கூறினார்.

இஸ்கந்தர் புத்திரியின் முத்தியாரா ரினியில் கணவர் காணாமல் போனதைத் தொடர்ந்து, ஜூலை 29ஆம் தேதி அவரது மனைவி காவல்துறையில் புகார் அளித்தார். இந்த வழக்கு தொடக்கத்தில் காணாமல் போன நபர் வழக்காகவே கையாளப்பட்டது.

முழு நிகழ்வு வரிசையைத் தெளிவுபடுத்த விசாரணை தொடர்கிறது.