ஜொகூரில் ஐந்து சோதனை: RM10.8 மில்லியன் போதைப்பொருள் பறிமுதல், ஏழு பேர் கைது

ஜொகூர் பாரு – கடந்த ஞாயிற்றுக்கிழமை நடத்தப்பட்ட ஐந்து தனித்தனி சோதனைகளில் காவல்துறை ஏழு பேரைக் கைது செய்து, RM10.8 மில்லியன் மதிப்புள்ள போதைப்பொருள் மற்றும் பிற பொருட்களைப் பறிமுதல் செய்தது. போதைப்பொருள் கடத்தல் கும்பல் ஒரு கொண்டோமினியத்தை வேப் திரவம் பொதியிடும் மையமாகப் பயன்படுத்தியது இதன்மூலம் அம்பலமானது.

ஜொகூர் காவல்துறை துணைத் தலைவர், துணை ஆணையர் ஹூ சுவான் ஹுவாட் கூறுகையில், குலாய், ஜொகூர் பாரு, இஸ்கந்தார் புத்திரி மற்றும் முவார் பகுதிகளில் காலை 11 மணிக்கு நடவடிக்கை தொடங்கியது.

கைதானவர்கள் ஐந்து உள்ளூர் ஆடவர்கள், ஒரு வெளிநாட்டு ஆடவர் மற்றும் ஒரு வெளிநாட்டுப் பெண் — வயது 36 முதல் 46 வரை.

"குலாய் R&R இல் உள்ள எரிபொருள் நிலையத்தில் நடத்தப்பட்ட முதல் சோதனையில் ஒரு உள்ளூர் ஆடவரும் ஒரு வெளிநாட்டுப் பெண்ணும் கைது செய்யப்பட்டனர். ஹோண்டா BR-V காரில் 82.40 கிலோகிராம் எடையுள்ள, RM4.12 மில்லியன் மதிப்புள்ள மெத்தாம்பெட்டமீன் திரவம் அடங்கிய 9,000 வேப் கார்ட்ரிட்ஜ்கள் கண்டெடுக்கப்பட்டன," என்று அவர் நேற்று ஜொகூர் காவல்துறை தலைமையகத்தில் நடந்த பத்திரிகையாளர் சந்திப்பில் தெரிவித்தார்.

"இரண்டாவது சோதனையில் பந்தார் மெடினி கொண்டோமினியத்தில் வேப் திரவம் நிரப்பும் மற்றும் பொதியிடும் கிடங்கு கண்டுபிடிக்கப்பட்டது. அங்கு 127.55 லிட்டர் மெத்தாம்பெட்டமீன் திரவம், 0.41 கிலோ கொக்கெய்ன் இரு பொட்டலங்கள், 40 கிராம் கெட்டமின் மற்றும் இயந்திரங்கள், உபகரணங்கள் பறிமுதல் செய்யப்பட்டன."

தாமான் சுத்தேரா உத்தாமாவில் நடந்த மூன்றாவது சோதனையில் ஒரு உள்ளூர் ஆடவர் கைதாகி, ஹெராயின், எரிமின் 5 மாத்திரைகள் மற்றும் எக்ஸ்டசி மாத்திரைகள் பறிமுதல் செய்யப்பட்டன. முத்தியாரா ரினி மற்றும் முவார் தஞ்சோங் ஆகாஸில் நடந்த மேலும் இரு சோதனைகளில், கும்பலில் முக்கியப் பங்கு வகித்ததாக நம்பப்படும் மூன்று உள்ளூர் ஆடவர்கள் கைதாகினர்.

முதல் சந்தேக நபர் கடத்துபவர், இரண்டாமவர் அவரது மனைவி, மூன்றாமவர் கிடங்கைக் கண்காணித்தவர், நான்காமவர் ரன்னர், ஐந்தாமவர் உபகரணப் பொதிகளைப் பெற்றவர், ஆறாமவர் கும்பல் நடவடிக்கைக்கு உதவியவர், ஏழாமவர் முதன்மைச் சூத்திரதாரி என நம்பப்படுகிறது என்று சுவான் ஹுவாட் கூறினார்.

மொத்தப் பறிமுதல் 210.43 கிலோகிராம், சந்தை மதிப்பு RM10.68 மில்லியன். சந்தையை எட்டியிருந்தால் 649,096 போதைப் பயனாளர்களுக்குப் போதுமானதாக இருந்திருக்கும்.

சிறுநீர் பரிசோதனையில் இருவருக்கு மெத்தாம்பெட்டமீன் நேர்மறை எனத் தெரிந்தது; நான்கு பேருக்கு குற்றவியல் மற்றும் போதைப்பொருள் பதிவுகள் உள்ளன. அனைவரும் ஆகஸ்ட் 3 முதல் ஏழு நாட்கள் தடுப்புக்காவலில் வைக்கப்பட்டுள்ளனர்.

வழக்கு 1952 ஆபத்தான போதைப்பொருள் சட்டத்தின் பிரிவு 39B கீழ் விசாரிக்கப்படுகிறது.