காஜாங் MRT நிலையத்தில் வாகனங்களில் சிவப்புச் சாயம்: போலிஸ் விசாரணை

காஜாங் – காஜாங் விரைவு போக்குவரத்து (MRT) நிலைய வாகன நிறுத்துமிடத்தில் நிறுத்தப்பட்டிருந்த சில வாகனங்களில் சிவப்புச் சாயம் தெளிக்கப்பட்ட சேதப்படுத்தும் சம்பவம் தொடர்பாக போலிஸ் விசாரணைக் கோப்பைத் திறந்துள்ளது.

காஜாங் மாவட்ட போலிஸ் தலைவர், உதவி ஆணையர் நாஸ்ரோன் அப்துல் யூசோஃப், இந்தச் சம்பவம் குறித்த முறையீடு நேற்று இரவு 8.29 மணிக்குப் பெறப்பட்டதாகக் கூறினார்.

முதற்கட்ட விசாரணையில், முறையீட்டாளர் 48 வயதுடைய உள்ளூர்ப் பெண் என்பது தெரியவந்தது. அவர் காலை சுமார் 6 மணியளவில் தமது பெரோடுவா மைவி காரை நிலையத்தின் நிறுத்துமிடப் பகுதிக்கு வெளியே நிறுத்திவிட்டு, MRT சேவை மூலம் பணிக்குச் சென்றுள்ளார்.

“மாலை சுமார் 6 மணிக்குத் திரும்பியபோது, தமது வாகனத்தின் வலது பக்க கண்ணாடியில் சிவப்புச் சாயம் தெளிக்கப்பட்ட தடயங்களை அவர் கண்டார்.

“மேலும் பரிசோதனையில், அதே பகுதியில் நிறுத்தப்பட்டிருந்த வேறு சில வாகனங்களிலும் சிவப்புச் சாயத் தடயங்கள் இருந்தன. இது பொறுப்பற்றவர்களால் செய்யப்பட்டிருக்கலாம்,” என அவர் இன்று ஓர் அறிக்கையில் தெரிவித்தார்.

இவ்வழக்கு, சேதம் விளைவிக்கும் குற்றத்திற்கான தண்டனைச் சட்டத்தின் பிரிவு 427-இன் கீழ் விசாரிக்கப்படுவதாக நாஸ்ரோன் கூறினார்.

சம்பவம் குறித்து தகவல் உள்ளவர்கள், விசாரணை அதிகாரி துணை ஆய்வாளர் நோர்ஹாஃப்ட்ஸெலி இஸ்மாயிலை 010-375 5508 என்ற எண்ணில் தொடர்புகொள்ளுமாறு கேட்டுக்கொள்ளப்படுகிறார்கள்.