நவம்பரில் உருகுவே, அர்ஜென்டினா, பெரு நாடுகளுக்கு போப் லியோ பயணம்: வத்திக்கான்

போப் லியோ இந்த நவம்பர் மாதம் உருகுவே, அர்ஜென்டினா மற்றும் பெரு நாடுகளுக்குப் பயணம் செய்வார் என வத்திக்கான் அறிவித்துள்ளது.

வத்திக்கானின் அறிவிப்பின்படி, போப் நவம்பர் 6 முதல் 8 வரை உருகுவேயில், நவம்பர் 8 முதல் 11 வரை அர்ஜென்டினாவில், நவம்பர் 11 முதல் 17 வரை பெருவில் தங்கியிருப்பார்.

அமெரிக்காவில் பிறந்த முதல் போப் ஆகிய லியோ, பெரு நாட்டின் குடிமகனும் ஆவார். அந்நாட்டின் வடமேற்குப் பகுதியில் உள்ள சிக்லாயோ மறைமாவட்டத்தின் ஆயராக அவர் 2015 முதல் 2023 வரை பணியாற்றினார்.

பெருவில் இருக்கும் போது போப் சிக்லாயோ, லிமா, குஸ்கோ மற்றும் புகால்பா நகரங்களுக்குச் செல்வார் என வத்திக்கான் தெரிவித்தது. அர்ஜென்டினாவில் புவெனஸ் அயர்ஸ், கோர்டோபா மற்றும் லுஜான் நகரங்களுக்கும், உருகுவேயில் மொன்டெவிடியோ, பைசாண்டு மற்றும் ஃபுளோரிடா நகரங்களுக்கும் அவர் விஜயம் செய்வார்.

பயணம் தொடர்பான மேலதிக விவரங்களை வத்திக்கான் வெளியிடவில்லை; முழு பயணத் திட்டம் பின்னர் அறிவிக்கப்படும் என்று மட்டும் கூறியது.

மறைந்த போப் பிரான்சிஸ் 2018ஆம் ஆண்டு சிலி மற்றும் பெரு நாடுகளுக்குச் சென்றதற்குப் பிறகு, எந்த ஒரு கத்தோலிக்க போப்பும் தென் அமெரிக்காவுக்கு விஜயம் செய்யவில்லை.

அர்ஜென்டினாவைச் சேர்ந்த பிரான்சிஸ், அமெரிக்கக் கண்டங்களில் இருந்து வந்த முதல் போப் என்றாலும், போப்பாக இருந்த காலத்தில் தமது தாய்நாட்டுக்கு அவர் ஒருபோதும் விஜயம் செய்யவில்லை.