ஊதிய பேச்சுவார்த்தையில் கான்டாஸ், விமானிகள் சங்கம் தற்காலிக ஒப்பந்தம்

ஆஸ்திரேலிய விமான நிறுவனமான கான்டாஸ் (Qantas) மற்றும் அதன் விமானிகள் சங்கம் ஊதிய பேச்சுவார்த்தையில் தற்காலிக ஒப்பந்தத்தை எட்டியுள்ளன. இதனால் நெடுந்தூர விமானிகளின் தொழில்துறை நடவடிக்கை அபாயம் குறைந்துள்ளது.

முக்கியமாக சர்வதேச வழித்தடங்களில் ஏர்பஸ் A380, A330 மற்றும் போயிங் 787 விமானங்களை இயக்கும் சுமார் 1,700 நெடுந்தூர விமானிகளை இந்த ஒப்பந்தம் உள்ளடக்கும். குறுந்தூர விமானிகளுக்குத் தனி ஒப்பந்தம் உள்ளது.

ஆஸ்திரேலியாவின் தொழில்துறை தகராறு தீர்ப்பு அமைப்பான Fair Work Commission-இல் நடந்த கலந்துரையாடல்களில் ஏற்பட்ட முன்னேற்றம் ஊக்கமளிப்பதாக ஆஸ்திரேலிய மற்றும் சர்வதேச விமானிகள் சங்கம் (AIPA) தெரிவித்தது.

"(கான்டாஸுடன்) பரந்த ஒப்பந்தம் எட்டப்பட்டுள்ளது. வரும் நாட்களில் இந்த ஒப்பந்தம் முறைப்படுத்தப்படும் என நம்புகிறோம்," என AIPA தலைவர் ஆண்ட்ரூ மார்ஷல் மின்னஞ்சல் வழியாக கூறினார். (மொழிபெயர்ப்பு)

கணிசமான ஊதிய உயர்வு, பணி அட்டவணை மேம்பாடுகள் மற்றும் கூடுதல் தொழில் வளர்ச்சி வாய்ப்புகளை வழங்கும், அதே நேரம் நிறுவனத்தின் தேவைகளையும் சமநிலைப்படுத்தும் ஒப்பந்தத்தில் "கொள்கை அளவில் உடன்பாடு" எட்டப்பட்டதில் மகிழ்ச்சி என கான்டாஸ் கூறியது.

ஊதியம் மற்றும் பணி நிலைமைகள் தொடர்பான பேச்சுவார்த்தைகள் தோல்வியடைந்ததை அடுத்து, வேலைநிறுத்தம் செய்வதா என்பதை ஊழியர்கள் முடிவு செய்யும் இரகசிய வாக்கெடுப்பான பாதுகாக்கப்பட்ட நடவடிக்கை வாக்கெடுப்புக்கு நிறுவனத்தின் பெரும்பாலான நெடுந்தூர விமானிகள் ஒப்புதல் அளித்திருந்தனர்.

இதற்கிடையே, கான்டாஸின் தரைப் பணியாளர் சங்கம் ஒன்று வியாழக்கிழமை, சுமார் 650 பணியாளர்கள் விரைவில் தொழில்துறை நடவடிக்கை குறித்து வாக்கெடுப்பில் பங்கேற்பார்கள் என்று தெரிவித்தது.

ஆஸ்திரேலியாவில் வேலைநிறுத்தம் உள்ளிட்ட பாதுகாக்கப்பட்ட தொழில்துறை நடவடிக்கைகளுக்கு, Fair Work Commission வாக்கெடுப்புக்கு ஒப்புதல் அளிக்க வேண்டும். பின்னர் அது சங்க உறுப்பினர்களின் வாக்கெடுப்புக்கு வைக்கப்படும். எந்தவொரு நடவடிக்கைக்கும் முன்னதாக முதலாளிகளுக்கு அறிவிப்பு வழங்கப்பட வேண்டும்.