அண்டார்டிகா 'இரத்த நீர்வீழ்ச்சி' மர்மம் அம்பலம்

வாஷிங்டன் – அண்டார்டிகாவின் புகழ்பெற்ற 'இரத்த நீர்வீழ்ச்சி' நிகழ்வுக்குப் பின்னால் உள்ள மர்மத்தை விஞ்ஞானிகள் அம்பலப்படுத்தியுள்ளனர். அப்பகுதியில் பழங்கால கடல் உயிரினங்களின் வழித்தோன்றல்கள் இன்னும் உயிருடன் வாழ்வது கண்டறியப்பட்டுள்ளது.

டெய்லர் பனிப்பாறையிலிருந்து பானி ஏரிக்குப் பாயும் இந்த இரத்தச் சிவப்பு நிற நீர்வீழ்ச்சி, இரத்தத்தை ஒத்திருப்பதால் நீண்ட காலமாக ஆய்வாளர்களின் கவனத்தை ஈர்த்து வந்தது.

பனிப் படலத்துக்கு அடியிலிருந்து வெளியேறும் இரும்புச்சத்து நிறைந்த உப்புநீர், தனித்துவமான கடல் நுண்ணுயிர்க் கூட்டத்திற்கு வாழ்விடமாக உள்ளது என்பதை புதிய ஆய்வு வெளிப்படுத்துகிறது. இவை இலட்சக்கணக்கான ஆண்டுகளாக பனிப்பாறைக்கு அடியில் சிக்கியுள்ளன.

அந்த நுண்ணுயிரிகளில் கடல் டையட்டம்கள், ஹாப்டோஃபைட்டுகள், டைனோஃபிளாஜலேட்டுகள் மற்றும் சிலியேட்டுகள் அடங்கும். இவை பொதுவாக கடல் பகுதிகளில் வாழும் மிகச் சிறிய உயிரினங்கள்.

பனிப்பாறை முன்னோக்கி நகர்ந்தபோது, சிக்கிக்கொண்ட கடல்நீர் பரந்த கடலிலிருந்து துண்டிக்கப்பட்டது; அப்போது தனிமைப்படுத்தப்பட்ட பழங்கால கடல் கூட்டத்தின் வழித்தோன்றல்களே இந்த உயிரினங்கள்.

இந்த மர்ம நீர் முதலில் கடலிலிருந்து வந்தது என்பதற்கு இதுவரை கிடைத்த மிக வலுவான உயிரியல் சான்றை இக்கண்டுபிடிப்பு வழங்குகிறது.

Nature Geoscience இதழில் வெளியான அறிக்கையில், ஆய்வாளர்கள் இப்பகுதியை துருவப் பாலைவனத்தில் அரிதாகக் காணப்படும் கடல் அடைக்கலப் பகுதி என விவரித்தனர்.

"டெய்லர் பனிப்பாறையின் முனையில் உள்ள பனிக்கடி உப்புநீரிலிருந்து உருவான இந்த அமைப்பு, கடலிலிருந்து நீண்ட காலமாகப் பிரிந்திருந்தும் கடல் தோற்றத்தின் உயிரியல் பண்புகளைத் தக்கவைத்துள்ளது," என அவர்கள் தெரிவித்தனர் (மொழிபெயர்ப்பு).

இரும்புச்சத்து நிறைந்த உப்புநீர் காற்றுடன் தொடர்பு கொள்ளும்போது துருப்பிடிப்பதால் இந்த இரத்தச் சிவப்பு நிறம் உருவாகிறது.

அண்டார்டிகாவின் மெக்முர்டோ உலர் பள்ளத்தாக்குகள் மற்றும் சுற்றுப்புறங்களிலிருந்து சேகரிக்கப்பட்ட 167 நீர், வண்டல், பனி மற்றும் காற்று மாதிரிகளை ஆய்வுக் குழு பகுப்பாய்வு செய்தது. – ஏஜென்சி