சேமிப்பிலிருந்து முதலீட்டுக்கு நகராத மலேசியர்கள்: காரணம் என்ன?

பல மலேசியர்கள் சேமிப்பிலிருந்து முதலீட்டுக்கு நகர்வதில் இன்னும் தயக்கம் காட்டுகின்றனர். இதற்குக் காரணம் முதலீட்டுத் தயாரிப்புகள் கிடைக்காமை அல்ல, நிச்சயமற்ற உணர்வே என YTL Power International நிர்வாக இயக்குநர் Hann Yeoh தெரிவித்தார்.

"முதலீடுகளை உண்மையிலேயே புரிந்துகொள்பவர்கள், அல்லது அதைப் பார்க்கத் துணிபவர்கள், மிகச் சிறிய விழுக்காட்டினரே," என்று அவர் FMT-க்குக் கூறினார் (மொழிபெயர்ப்பு).

முதல் முறையாக முதலீடு செய்வோர், தங்கள் நிதி இலக்குகளுக்கும் இடர் ஏற்புத் திறனுக்கும் எந்தத் தயாரிப்பு பொருத்தமானது என்பதில் தெளிவில்லாமல் உள்ளனர்; தொழில்முறை வழிகாட்டல் இல்லாமல் இச்செயல்முறை அச்சம் தருவதாக உள்ளது என்றார்.

முதலீடு செல்வந்தர்களுக்கு மட்டுமே என சிலர் நினைக்கிறார்கள்; தயாரிப்புகள் எவ்வாறு இயங்குகின்றன என்பதை முழுமையாக அறியாததால் தவறு செய்துவிடுவோமோ என வேறு சிலர் அச்சப்படுகிறார்கள் என்று அவர் கூறினார்.

"தனியாக இருந்து 'இதை எப்படிச் செய்வது?' என எண்ணும்போது அது மிகவும் அச்சம் தரும்," என்றார்.

ஆரம்பத்திலேயே பெரிய இடரை ஏற்கச் சொல்வதற்குப் பதிலாக, சிறிய அளவில் தொடங்கி, தயாரிப்புகளைக் கற்று, படிப்படியாக நம்பிக்கை வளர்க்க உதவுவதே கவனமாக இருக்க வேண்டும் என்றார்.

வங்கிச் சேவையைப் பொதுமக்களுக்கு எடுத்துச் சென்றது போலவே, செயற்கை நுண்ணறிவு (AI) மற்றும் தொழில்நுட்பத்தைப் பயன்படுத்தி Ryt Bank முதலீட்டையும் அனைவருக்கும் எட்டும் வகையில் மாற்றுகிறது என்றார்.

Ryt Bank சமீபத்தில் Ryt Invest எனும் இலக்கமுறை முதலீட்டுத் தளத்தை அறிமுகப்படுத்தியது. RM10 பில்லியனுக்கும் மேற்பட்ட சொத்துகளை நிர்வகிக்கும், 25 ஆண்டு அனுபவமுள்ள Opus Asset Management உடன் இணைந்து இது உருவாக்கப்பட்டது.

"நுழைவுத் தொடக்கத்தைக் குறைவாகவும், புரியும்படியும் வைக்க விரும்பினோம் — RM1 அளவிலிருந்தே முதலீடு தொடங்க முடியும்," என்றார்.

Ryt Invest மூன்று தேர்வுகளை வழங்குகிறது: SavePlus — ஷரியா இணக்கமான, முதலீட்டுத் தரப் பத்திரங்களை நோக்கிய குறைந்த இடர் அணுகுமுறை; Income — அதிக நீண்டகால வருவாய் தேடுவோருக்குப் பல சொத்து வகைகளில் பரவலான முதலீடு; Gold — உலகில் மிகவும் அறியப்பட்ட மதிப்புச் சேமிப்புச் சொத்தில் ஈடுபாடு.

கல்வியும் சமமாக முக்கியம் என்றார். பயனர்கள் முதலீட்டுத் தேர்வுகள், முக்கிய அம்சங்கள், இடர் நிலைகள் பற்றி வினவ Ryt AI இணைக்கப்பட்டுள்ளது.

முதலீட்டு முடிவுகளும் நிதி நிர்வாகமும் தொழில்முறை நிதி மேலாளர்களின் மேற்பார்வையில் இருக்கும்; AI கல்விக் கருவியாக மட்டுமே செயல்படும், பயனர்களுக்காக முடிவெடுக்காது என்று அவர் வலியுறுத்தினார்.

"மிகச் சிறிய அளவில் தொடங்குங்கள், பின்னர் கற்றுக்கொள்ளுங்கள். தொடங்குவதே மிக முக்கியம்," என்றார்.