தபுங் ஹாஜி RCI: சட்டப்பூர்வ அமைப்பு நிறுவனத்தின் முன்னாள் CEO, CFO கைது

கோலாலம்பூர்: தபுங் ஹாஜி தொடர்பான அரச விசாரணை ஆணையத்தின் (RCI) அறிக்கை வெளியானதைத் தொடர்ந்து, ஒரு சட்டப்பூர்வ அமைப்புக்குச் சொந்தமான நிறுவனத்தின் முன்னாள் தலைமைச் செயல் அதிகாரி (CEO) மற்றும் முன்னாள் தலைமை நிதி அதிகாரி (CFO) ஆகியோரை மலேசிய ஊழல் தடுப்பு ஆணையம் (MACC) கைது செய்துள்ளது.

முறையே 68 மற்றும் 60 வயதுடைய இருவரும், ரிம370 மில்லியன் மதிப்பிலான இரு தோட்ட நிறுவனங்களின் பங்குகளை வாங்கும் செயல்முறையில் அதிகாரத்தை துஷ்பிரயோகம் செய்ததாக ஐயுறப்படுகிறது.

பெரித்தா ஹரியான் செய்தியின்படி, இருவரும் நேற்று மாலை 6.30 மணிக்கு MACC தலைமையகத்தில் வாக்குமூலம் அளிக்க வந்தபோது கைது செய்யப்பட்டனர். எனினும், உடல்நலக் காரணங்களுக்காக நேற்றிரவு விடுவிக்கப்பட்ட அவர்கள், வாக்குமூலப் பதிவைத் தொடர இன்று காலை மீண்டும் MACC-க்கு வர வேண்டும்.

இந்தக் கைதை MACC தலைமை ஆணையர் அப்துல் ஹலீம் அமான் உறுதிப்படுத்தினார். வழக்கு 2009 MACC சட்டத்தின் பிரிவு 23-இன் கீழ் விசாரிக்கப்படுவதாக அவர் தெரிவித்தார்.

RCI அறிக்கை வெளியானதைத் தொடர்ந்து, சுமார் ரிம8 மில்லியன் மதிப்பிலான வழங்கல் ஒப்பந்தம் மற்றும் ரிம300,000 கையூட்டு தொடர்பான தனித்தனி இரு வழக்குகளில் இரு ஆண்கள் முதலில் கைது செய்யப்பட்டதாக ஊடகங்கள் முன்னதாகச் செய்தி வெளியிட்டன.

அவர்களில் ஒருவர், ஒரு சட்டப்பூர்வ அமைப்பின் முன்னாள் தலைமை செயல்பாட்டு அதிகாரிக்கு (COO) கையூட்டு வழங்கியதாக ஐயுறப்படும் வடிவமைப்பு நிறுவன இயக்குநர்; மற்றொருவர், ரப்பர் நாற்று வழங்கல் ஒப்பந்தத்தில் முறைகேடு செய்ததாக நம்பப்படும் முன்னாள் தோட்ட மேலாளர்.

ஆதாரங்களின்படி, 50 வயதுகளில் உள்ள அந்த இயக்குநர், முன்னாள் COO-க்குச் சொந்தமான நான்கு வீடுகளின் புதுப்பிப்புப் பணிகளுக்கு மொத்தம் சுமார் ரிம300,000 செலவிட்டதாக நம்பப்படுகிறது.

2014 முதல் 2018 வரை அந்த சட்டப்பூர்வ அமைப்பில் புதுப்பிப்புத் திட்டங்களைப் பெற உதவியதற்கு ஈடாக இந்தக் கையூட்டு வழங்கப்பட்டதாகக் கருதப்படுகிறது.

அந்த சந்தேக நபர், முந்தைய நாள் இரவு சுமார் 7.30 மணிக்கு MACC தலைமையகத்தில் வாக்குமூலம் அளிக்க வந்தபோது கைது செய்யப்பட்டார்.