RCI அறிக்கைக்குப் பின் 97 லட்சம் வைப்பாளர்களின் நம்பிக்கையை மீட்க வேண்டும்: தபுங் ஹாஜி

தபுங் ஹாஜி (TH) தொடர்பான அரச விசாரணை ஆணையத்தின் (RCI) அறிக்கை கடந்த வாரம் வெளியானதையடுத்து, பல ஆண்டுகளாக பொதுமக்களிடையேயும் வைப்பாளர்களிடையேயும் நிலவி வந்த கேள்விகளுக்கு விடை காணும் புதிய அத்தியாயம் தொடங்கியுள்ளது.

கோஸ்மோ நாளிதழின் தலையங்கம், RCI-யின் கண்டுபிடிப்புகளும் முடிவுகளும் கடந்தகால நிகழ்வுகளை ஆய்வு செய்வதோடு நின்றுவிடக் கூடாது எனக் கூறியுள்ளது. முஸ்லிம் சமூகத்தின் பெருமைக்குரிய அந்த நிறுவனத்தின் மீது 97 லட்சம் வைப்பாளர்களின் நம்பிக்கையை மீட்பதே தற்போதைய முக்கியப் பணி என அது சுட்டிக்காட்டுகிறது.

"நம்பிக்கை இல்லாவிட்டால், ஒரு நிதி நிறுவனம் தள்ளாடும்; எதிர்கால சவால்களை எதிர்கொள்வதும் கடினமாகும்," என தலையங்கம் குறிப்பிட்டது.

தபுங் ஹாஜி சாதாரண வங்கி அல்ல எனவும், இஸ்லாத்தின் ஐந்தாவது கடமையை நிறைவேற்ற முஸ்லிம்கள் ஷரியா நெறிமுறைக்கு உட்பட்டு சேமிக்க உதவும் நிறுவனம் எனவும் அது நினைவூட்டியது. அதேவேளை, வைப்பாளர்களுக்குப் போட்டித்தன்மை வாய்ந்த வருவாயை வழங்கும் முதலீட்டுக் கருவியாகவும் அது செயல்படுகிறது.

பல பத்தாண்டுகளாக அந்நிறுவனம் நாட்டு முஸ்லிம்களின் பொருளாதார நலனுக்குப் பெரும் பங்களிப்பு செய்துள்ளது. மலேசியாவில் மட்டுமன்றி சர்வதேச அளவிலும் வெற்றிகரமான இஸ்லாமிய நிதி மேலாண்மையின் அடையாளமாக அது சுட்டிக்காட்டப்பட்டு வந்துள்ளது.

எனவே, அதன் நிர்வாகம் குறித்து சர்ச்சை எழும்போது, மிகப்பெரிதும் பாதிக்கப்படுவது அந்நிறுவனத்தின் மீதான பொதுமக்கள் நம்பிக்கையே.

கடந்தகால நிகழ்வுகளிலிருந்து பெற்ற பாடங்கள் உண்மையிலேயே சீர்திருத்தங்களாக மாறியுள்ளன என்பதை நிரூபிப்பதே தபுங் ஹாஜி நிர்வாகத்தின் மிகப் பெரிய சவால். நிர்வாக நெறிமுறை, இடர் மேலாண்மை, வெளிப்படைத்தன்மை, பொறுப்புக்கூறல் ஆகியவற்றில் மாற்றத்தை வைப்பாளர்கள் எதிர்பார்க்கின்றனர்.

பொது நலனுடன் நெருங்கிய தொடர்புடைய நிறுவனமாக, தொழில்முறை முடிவுகளைப் பாதிக்கக்கூடிய எந்த தலையீட்டிலிருந்தும் அது விடுபட்டிருக்க வேண்டும். ஒவ்வொரு முடிவும் நல்ல நிர்வாகக் கோட்பாடு, நிபுணத்துவம், நிறுவனத்தின் நீண்டகால நலன் ஆகியவற்றின் அடிப்படையில் இருக்க வேண்டும் என்பதே வைப்பாளர்களின் எதிர்பார்ப்பு.

நம்பிக்கை கட்டியெழுப்ப ஆண்டுகள் தேவை; ஆனால் குறுகிய காலத்தில் அது சிதைந்துவிடும். மக்கள் மீண்டும் தபுங் ஹாஜி மீது நம்பிக்கை வைக்கும்போதுதான் RCI-யின் உண்மையான வெற்றி அர்த்தமுள்ளதாகும் என தலையங்கம் முடிக்கிறது.