தபுங் ஹாஜி RCI: அடையாளம் காணப்பட்டவர்கள் மீது LHDN விசாரணை

கோலாலம்பூர் — லெம்பாகா தபுங் ஹாஜி (TH) தொடர்பான அரச விசாரணை ஆணையக் (RCI) அறிக்கையைத் தொடர்ந்து அடையாளம் காணப்பட்ட நபர்கள் மீது உள்நாட்டு வருவாய் வாரியம் (LHDN) விசாரணையைத் தொடங்கியுள்ளது.

இன்று வெளியிடப்பட்ட அறிக்கையில், வரி அபாய பகுப்பாய்வின் அடிப்படையில் இந்த விசாரணை மேற்கொள்ளப்படுவதாக LHDN கூறியது. அந்தப் பகுப்பாய்வில், சம்பந்தப்பட்ட நபர்களின் சொத்து உரிமைக்கும் அவர்கள் அறிவித்த வருமானத் தொகைக்கும் இடையே பொருத்தமின்மை கண்டறியப்பட்டது.

தகவல்களைப் பெறவும், ஆவணங்களைச் சரிபார்க்கவும், விசாரணை தொடர்பான உண்மைகளை உறுதிப்படுத்தவும் சில வளாகங்களில் LHDN சோதனை நடத்தியுள்ளதாக அந்த அறிக்கை தெரிவித்தது.

"ஒவ்வொரு மறுஆய்வும் விசாரணையும் தொழில்முறையாக, நேர்மையுடன், நடைமுறையிலுள்ள வரிச் சட்ட விதிகளின் அடிப்படையில், எந்தத் தரப்புக்கும் பாரபட்சமின்றி மேற்கொள்ளப்படுகிறது," என்று அது கூறியது.

"மேலதிக நடவடிக்கை, விசாரணை முடிவுகள், தகவல் ஆய்வு மற்றும் மறுஆய்வுச் செயல்முறையின்போது பெறப்படும் சான்றுகளின் அடிப்படையில் மட்டுமே தீர்மானிக்கப்படும்," என அறிக்கை குறிப்பிட்டது.

விசாரணைக்கு உட்பட்டவர்களின் பெயர்களையோ, சோதனை நடத்தப்பட்ட வளாகங்களின் எண்ணிக்கையையோ LHDN வெளியிடவில்லை.

211 பக்க RCI அறிக்கை

ஜூலை 29ஆம் தேதி, மலேசிய இஸ்லாமிய முன்னேற்றத் துறை (ஜாகிம்), 2014 முதல் 2020 வரையிலான காலகட்டத்தில் TH-இன் நிர்வாகம் மற்றும் செயல்பாடுகள் குறித்த விசாரணை தொடர்பான 211 பக்க RCI அறிக்கையை வெளியிட்டது.

இந்த வரி விசாரணை தொடர்பாக இதுவரை எந்தத் தரப்பின் மீதும் குற்றச்சாட்டு தாக்கல் செய்யப்படவில்லை.