உயிருக்கு அச்சுறுத்தல் இருந்தால் ரோஹிங்யா அகதிகள் திருப்பி அனுப்பப்படமாட்டார்கள்: ஃபாஹ்மி

ரோஹிங்யா அகதிகளின் உயிருக்கு அச்சுறுத்தல் இருந்தால், அவர்களை மியன்மாருக்குத் திருப்பி அனுப்ப மாட்டோம் என்று தகவல்தொடர்பு அமைச்சர் ஃபாஹ்மி ஃபாட்ஸில் கூறினார்.

இரு நாடுகளுக்கு இடையேயான பேச்சுவார்த்தையைத் தொடர்ந்து 5,000 அகதிகளை மீண்டும் ஏற்றுக்கொள்ள மியன்மார் ஒப்புக்கொண்டுள்ளதாகப் பிரதமர் அன்வார் இப்ராஹிம் அறிவித்ததை அடுத்து, திருப்பி அனுப்பப்படவுள்ள அகதிகளை வெளியுறவு அமைச்சும் உள்துறை அமைச்சும் இனங்கண்டு வருகின்றன என்றார்.

"அகதிகளின் உயிருக்கு அச்சுறுத்தல் இருந்தால் அவர்களைத் திருப்பி அனுப்ப முடியாது என்பதை பிரதமர் கவனத்தில் கொண்டுள்ளார்.

"எனவே, (திருப்பி அனுப்புவதை) நடைமுறைப்படுத்துவதற்கு முன், மியன்மார் அரசாங்கத்துடனான கலந்துரையாடலில் சில விஷயங்களை நாங்கள் ஆராய்வோம்," என்று அமைச்சரவைக் கூட்டத்திற்குப் பிறகு நடைபெற்ற செய்தியாளர் சந்திப்பில் அவர் கூறினார்.

அகதிகளைத் திருப்பி அனுப்பும் நடைமுறைக்கு மியன்மார் நிர்ணயித்துள்ள நிபந்தனைகளையும் புத்ராஜெயா ஆராயும், அவை பொருத்தமானவை என்று கண்டறியப்பட்டால் அவற்றைப் பின்பற்றும் என்றார்.

அகதிகள் பாதுகாப்பாகச் சென்றடைவார்கள் என்ற உறுதிமொழியை மியன்மாரிடமிருந்து அரசாங்கம் பெற்றுள்ளதா, செலவை யார் ஏற்பார், எந்த வகையான போக்குவரத்து பயன்படுத்தப்படும் என்ற கேள்விகளுக்கு அவர் இவ்வாறு பதிலளித்தார்.

இதற்கு முன், மனித உரிமை அமைப்புகள் மற்றும் அரசியல்வாதிகள் உட்பட பல தரப்பினர், அந்த இனக்குழு மியன்மாரில் இன்னும் ஒடுக்குமுறையை எதிர்கொள்வதாகக் கூறி, 5,000 அகதிகளைத் திருப்பி அனுப்பும் அரசாங்கத்தின் முடிவைக் கேள்வி எழுப்பியிருந்தனர்.

இந்தோனேசியாவில் தடுத்து வைக்கப்பட்ட விமானி வழக்கு

தனி நிகழ்வாக, ஜகார்த்தாவின் சொயெகர்னோ-ஹத்தா சர்வதேச விமான நிலையம் வழியாக சுமார் 25 கிலோ போதைப்பொருளைக் கடத்த முயன்றதாகச் சந்தேகிக்கப்பட்டு, கடந்த வாரம் இந்தோனேசிய அதிகாரிகளால் தடுத்து வைக்கப்பட்ட மலேசிய விமானி தொடர்பான வழக்கையும் அமைச்சரவை விவாதித்தது என்று ஃபாஹ்மி கூறினார்.

உடனடியாக நடைமுறைப்படுத்த வேண்டிய மேம்பாட்டு நடவடிக்கைகள் குறித்து போக்குவரத்து அமைச்சும் உள்துறை அமைச்சும் விளக்கமளித்தன; தற்போதுள்ள துணைப் போலீஸ் படையைத் தவிர போலீஸ் அதிகாரிகளையும் நிலைநிறுத்தி விமான நிலைய பாதுகாப்பைப் பலப்படுத்துவதும் இதில் அடங்கும் என்றார்.

"விமானிகள் மற்றும் துணை விமானிகளுக்கான பின்னணி சரிபார்ப்பு நெறிமுறைகளையும் சுகாதார பரிசோதனையையும் மறுஆய்வு செய்ய மலேசியா ஏர்லைன்ஸ் கேட்டுக்கொள்ளப்படும்.

"தவறாகப் பயன்படுத்தப்படக்கூடிய அம்சங்கள், இருக்கக்கூடிய ஓட்டைகள் உட்பட ஆராயவும், அவற்றை உடனடியாக அடைத்து நிர்வகிக்கவும் போலீஸ் மற்றும் மலேசிய எல்லைக் கட்டுப்பாடு மற்றும் பாதுகாப்பு முகமை கேட்டுக்கொள்ளப்பட்டுள்ளன," என்றார்.