ராக்கி மரணம்: பிடிப்பு நடவடிக்கை குறித்து விளக்கம் கோரும் விலங்கு சங்கம்

கிள்ளான் அரச நகர மன்றம் (MBDK) அமலாக்கப் பிரிவினரின் நாய் பிடிப்பு நடவடிக்கையின்போது ராக்கி எனும் செல்லப் பிராணி நாய் இறந்த விவகாரத்தில், முக்கிய கேள்விகளுக்கு விளக்கம் அளிக்க வேண்டும் என மலேசிய விலங்கு சங்கம் (SAFM) அதிகாரிகளை வலியுறுத்தியுள்ளது.

அந்த நடவடிக்கைக்கு அதிகாரப்பூர்வ உத்தரவு இருந்ததா, அதை வழிநடத்தியது யார், விலங்கைப் பிடித்தது யார், பொதுமக்கள் அதில் ஈடுபட்டனரா என்பவை சங்கம் எழுப்பிய கேள்விகளில் அடங்கும்.

SAFM தலைவர் கலைவாணன், நடவடிக்கையில் பயன்படுத்தப்பட்ட கருவி வகை குறித்தும் கேள்வி எழுப்பினார்.

"அந்தக் கருவியைப் பொருத்தியது, பிடித்தது, கட்டுப்படுத்தியது யார்? ராக்கி இழுத்துச் செல்லப்பட்டதா? கயிற்றுச் சுருக்கில் ராக்கி இருந்தபோது அதிகாரிகள் என்ன செய்தனர்? அந்தச் சுருக்கு ஏன் முன்பே அகற்றப்படவில்லை?" எனப் பெட்டாலிங் ஜெயாவில் இன்று நடந்த "Justice for Rocky" செய்தியாளர் சந்திப்பில் அவர் கேட்டார். (மலாய் மொழியிலிருந்து மொழிபெயர்க்கப்பட்டது)

நடவடிக்கைப் பதிவுகளையும் முழு அறிக்கையையும் வெளியிடுமாறு அவர் MBDKயை வலியுறுத்தினார்.

ராக்கியின் உரிமையாளர் ரோகிணி தேவி, சங்கத்தின் அதிகாரப்பூர்வ WhatsApp வழியாக ஜூலை 30ஆம் தேதி முறையிட்டதையடுத்து, காணொலி, ஆவணங்கள் மற்றும் சாட்சி தகவல்கள் ஆய்வு செய்யப்பட்டன என்றார்.

போலிஸ் (PDRM) மற்றும் கால்நடை சேவைத் துறை (DVS)க்கு முழு ஒத்துழைப்பு அளித்து அதிகாரப்பூர்வ வழிகளைப் பயன்படுத்த ரோகிணிக்கு அறிவுரை வழங்கியதுடன், தென் கிள்ளான் மாவட்ட போலிஸ் தலைமையகத்தில் வாக்குமூலம் அளிக்க அழைக்கப்பட்டபோது சட்ட உதவியை ஒருங்கிணைத்ததாகவும் கூறினார்.

"PDRM அல்லது DVSயின் பணியை ஏற்பது SAFMயின் பங்கல்ல. முறையீட்டாளருக்கு வழிகாட்டல், ஆதரவு மற்றும் சரியான வழிகளை அணுக உதவுவதே எங்கள் பங்கு... இந்த வழக்கு உண்மையான நடைமுறை வழியே நகர வேண்டும், ஒரு பரவிய காணொலியில் நின்றுவிடக் கூடாது," என்றார்.

கிள்ளான் துறைமுகம், தாமான் தெலுக் கெடோங் இந்தாவில் ராக்கி இறந்த காணொலி சமூக ஊடகங்களில் பரவியிருந்தது. இச்சம்பவம் ஜூலை 29 இரவு சுமார் 10.50 மணிக்கு நடந்ததாகக் கூறப்படுகிறது.

பிடிக்கப்படுவதற்கு முன் ராக்கியின் தலையில் அடிக்கப்பட்டது எனக் கலைவாணன் குற்றம் சாட்டினார்; தான் வந்தபோது நாயின் கழுத்தில் சுருக்கு இருந்தது என ரோகிணி கூறினார். ராக்கியைக் காப்பாற்ற முயன்றபோது தனது வலது கை தடியால் தாக்கப்பட்டதாகவும் அவர் கூறினார்.

எனினும், இறப்புக்கான காரணம் DVSயின் அதிகாரப்பூர்வ பரிசோதனை மூலமே தீர்மானிக்கப்பட வேண்டும் என்பதால் SAFM எந்த முடிவுக்கும் வரவில்லை என்றார்.

உரிமப் பிரச்சினை விலங்கு நலனைப் புறக்கணிக்கக் காரணமாக இருக்க முடியாது என்றார். "உரிமம் இல்லாதது, ஒரு விலங்கிற்கு தேவையற்ற வலியையும் துன்பத்தையும் ஏற்படுத்த யாருக்கும் உரிமை அளிக்காது."

நடவடிக்கை SOP அடிப்படையில் நடந்ததென MBDK கூறியதற்கு பதிலளித்த அவர், நாய்களை கவனமாகப் பிடிக்க வேண்டும், சுருக்கைப் பயன்படுத்தி இழுக்கவோ தூக்கவோ கூடாது எனக் கூறும் KPKTயின் 2015 ஆண்டு 5ஆம் இலக்க சுற்றறிக்கையைச் சுட்டிக்காட்டினார்.

விலங்கு பிடிப்பு SOPகளை மறுஆய்வு செய்ய இது சிலாங்கூர் அரசுக்கு வாய்ப்பு என்றார். "பிடிக்க வேண்டாம் என்று சொல்லவில்லை. கவனமாகப் பிடிக்க வேண்டும், வன்முறை இருக்கக் கூடாது என்கிறோம்."

MACAMI தலைவர் Salehatul Khuzaimah Mohammad Ali, இது பாடமாக இருக்க வேண்டும் எனக் கூறினார். தெருநாய் பிரச்சினைக்கு நீண்டகால தீர்வு தேவை; விலங்கு நலனும் பொதுப் பாதுகாப்பும் சமநிலைப்படுத்தப்பட SOPகள் மேம்படுத்தப்பட வேண்டும் என்றார்.