சீன பங்குச் சந்தை கலவையாக நிறைவு; தங்கப் பங்குகள் உயர்வு, ஹாங்காங்கில் காப்பீட்டுப் பங்குகள் சரிவு

தங்க விலை உயர்வு தொழில்நுட்பப் பங்குகளின் பலவீனத்தை ஈடுசெய்ததால் சீன பங்குச் சந்தைகள் கலவையாக நிறைவடைந்தன. அதே வேளையில் காப்பீட்டு நிறுவனப் பங்குகளின் கடும் சரிவால் ஹாங்காங் சந்தை இறங்கியது.

அளவுகோல் ஷாங்காய் கூட்டுக் குறியீடு 0.6% உயர்ந்து நிறைவடைந்தது; ப்ளூ-சிப் CSI300 குறியீடு 0.2% குறைந்தது. பிராந்திய சந்தைகளின் இழப்புகளைத் தொடர்ந்து தொழில்நுட்பப் பங்குகள் சரிந்தன; தொடக்க நிறுவனங்களுக்கான CHINEXT பலகை 0.6% வீழ்ச்சியடைந்தது.

பலவீனமான டாலர், குறைந்த கருவூலப் பத்திர வருவாய் விகிதங்கள், மேலும் ஹோர்முஸ் நீரிணை மீண்டும் திறக்கப்படுவது குறித்த நம்பிக்கை ஆகியவற்றால் ஸ்பாட் தங்கம் ஏழு வார உச்சத்தைத் தொட்டது. CSI இரும்பு அல்லாத உலோகங்கள் துணைக் குறியீடு 0.7% உயர்ந்தது.

சீனா–அமெரிக்கா இடையேயான சமீபத்திய பதிலடி நடவடிக்கைகள் வர்த்தக மற்றும் தொழில்நுட்ப பதற்றத்தை மீண்டும் தூண்டின; எனினும் சந்தைகளில் அதன் தாக்கம் குறைவாகவே இருந்தது. ஒளிமின்னழுத்தத் (photovoltaic) துறை துணைக் குறியீடு 1.2% சரிந்தது.

"பொருளாதார மற்றும் புவிசார் அரசியல் வல்லரசுகள் இரண்டும் ஒன்றையொன்று சார்ந்திருக்கும் தொழில்நுட்பச் சார்பைக் குறைக்கத் துணிந்துள்ளன; எனவே நாம் தொடர்ச்சியான உலகளாவிய தொழில்நுட்பப் பிளவில் சிக்கியுள்ளோம்," என்று BNP Paribas நிறுவனத்தின் APAC பங்கு ஆய்வுத் தலைவர் வில்லியம் பிராட்டன் கூறினார். (மொழிபெயர்ப்பு)

ஹாங்காங்கில் ஹாங்செங் குறியீடு 1.5% சரிந்தது; அந்நகரின் தொழில்நுட்பப் பங்குகள் 2.3% இழந்தன.

கடல்கடந்து ஈட்டப்படும் காப்பீட்டுப் பாலிசி வருமானத்திற்கு சீன பிரதான நிலப்பரப்பு வரி அதிகாரிகள் வரி விதிக்கத் தொடங்கியதாக ரொய்ட்டர்ஸ் ஆதாரங்களை மேற்கோள்காட்டி அறிவித்ததை அடுத்து காப்பீட்டுப் பங்குகள் இழப்பில் முன்னணி வகித்தன. புருடென்ஷியல் பங்கு 4.6% சரிந்தது; AIA குழுமம் 6% வீழ்ந்தது.

சீன பொருளாதாரத்தின் வலிமை குறித்த சமிக்ஞைகளுக்காக வெள்ளிக்கிழமை வெளியாகவுள்ள வர்த்தகத் தரவுகளில் முதலீட்டாளர்கள் கவனம் செலுத்துவர்.

"சீனாவின் 'இரு வேக' பொருளாதாரம் வெறும் பொருளாதார நிகழ்வு அல்ல; 'போதுமான அளவு' விதியின் திட்டமிட்ட விளைவு. வளர்ச்சி இலக்கை எட்டப் போதுமான அளவு ஊக்கத்தை மட்டுமே கொள்கை வகுப்பாளர்கள் வழங்குகின்றனர்," என்று Macquarie நிறுவனத்தின் தலைமை சீன பொருளாதார நிபுணர் லாரி ஹு கூறினார்.

"ஏற்றுமதி மற்றும் உற்பத்தி எனும் வலுவான பாதை வலுவாக இருந்தால், நுகர்வு மற்றும் சொத்துத் துறை எனும் பலவீனமான பாதைக்கான கொள்கை ஆதரவு கட்டுப்படுத்தப்பட்டே இருக்கும்," என்றார். (மொழிபெயர்ப்பு)