'திரிக்கப்பட்ட' கருத்துகள்: நகா, மரீனாவுக்கு சானுசி சட்ட நோட்டீஸ்

கெடா மந்திரி பெசார் முகம்மட் சானுசி மட் நோர், தமது கருத்துகள் திரிக்கப்பட்டதாகக் கூறி நகா கோர் மிங், மரீனா மகாதீர் மற்றும் சலீம் அப்துல் ரஹ்மான் ஆகியோருக்கு சட்ட நோட்டீஸ் அனுப்பியுள்ளார்.

நெகிரி செம்பிலான் தேர்தல் பிரசாரத்தின்போது ஒரு சொற்பொழிவில் தாம் கூறிய கருத்துகளைத் திரித்ததற்காக மூவரும் ஏழு நாட்களுக்குள் மன்னிப்புக் கேட்க வேண்டும் என அவர் கோரியுள்ளார். இல்லையேல் வழக்குகள் தொடரப்படும் என்று பெரிட்டா ஹரியான் செய்தி தெரிவித்தது.

"இன்று நகா மற்றும் சலீமுக்கு நோட்டீஸ் வழங்கப்பட்டது. இன்று மரீனாவிடம் சேர்ப்பிக்க முடியாவிட்டால், நாளை அவர் அதைப் பெறுவார்," என்றார்.

பாஸ் கட்சியின் தேர்தல் இயக்குநராகவும் உள்ள சானுசி, தமது கருத்துகளைத் திரித்த மேலும் பலருக்கும் நோட்டீஸ் அனுப்பப்படும் எனவும், "பெயர்ப் பட்டியல் நீளமானது" எனவும் கூறினார்.

"உண்மைகளைத் திரித்தவர்கள், எனது அறிக்கையுடன் சேர்த்துக் கூறியவர்கள், அல்லது எனது அறிக்கையைப் பயன்படுத்திக் கொண்டவர்கள் நோட்டீஸ் பெறுவார்கள்.

"மன்னிப்புக் கேட்க ஏழு நாட்கள் தருகிறோம். இல்லையேல், நீதிமன்றத்தில் சந்திப்போம்," என்றார்.

மலேசியாவில் சில இனக்குழுக்களுக்கு நாட்டுக்கு வெளியே மூதாதையர் தாயகங்கள் உள்ளன எனக் குறிப்பிட்டதன் மூலம் நெகிரி செம்பிலான் தேர்தல் பிரசாரத்தின்போது சானுசி சர்ச்சையைக் கிளப்பினார்.

"சீனர்களுக்கு சீனா உள்ளது, இந்தியர்களுக்கு இந்தியா உள்ளது, கம்போடியர்களுக்கு கம்போடியா உள்ளது, மலாய்க்காரர்களுக்கு மலேசியா மட்டுமே உள்ளது" என அவர் கூறியதாகச் செய்தி வெளியானது.

எனினும், மலேசிய சீனர்கள் மற்றும் இந்தியர்களின் குடியுரிமையையோ உரிமைகளையோ கேள்விக்குட்படுத்தும் நோக்கம் தமக்கு இல்லை என அவர் மறுத்தார்.

இக்கருத்துகள் தொடர்பாக காவல்துறை விசாரணையைத் தொடங்கி, ஞாயிற்றுக்கிழமை அவரது வாக்குமூலத்தைப் பதிவு செய்தது.