'தானா மெலாயு' உரை: நகாவுக்கு சட்ட நோட்டீஸ் அனுப்பவுள்ளார் சானுசி

அலோர் ஸ்டார்: தமது 'தானா மெலாயு' உரை தொடர்பாக வெளியிடப்பட்ட கருத்துகள் குறித்து நகா கோர் மிங்குக்கு சட்ட நோட்டீஸ் (LOD) அனுப்பவுள்ளதாக கெடா மந்திரி பெசார் முகம்மது சானுசி மட் நோர் தெரிவித்தார்.

தமது வழக்கறிஞர் மூலம் எடுக்கப்படும் இச்சட்ட நடவடிக்கை, ஸ்குடாய் முன்னாள் சட்டமன்ற உறுப்பினர் மரீனா இப்ராஹிம் மற்றும் சமூக ஊடகப் பயனர் சலீம் அப்துல் ரஹ்மான் ஆகியோரையும் இலக்காகக் கொண்டுள்ளது என்றார்.

அவர்கள் மூவரும் வெளியிட்ட கருத்துகளுக்காக பொதுவெளியில் மன்னிப்புக் கோர ஏழு நாள் அவகாசம் அளிக்கப்பட்டுள்ளது என அவர் கூறினார்.

"இந்த சட்ட நோட்டீஸை வழக்கறிஞர் கையாள்கிறார், அது தயாராகிவிட்டது. இன்று வழங்கப்படாவிட்டால், நாளை வழங்கப்படும்.

"அதில் மன்னிப்புக் கோர ஏழு நாள் அவகாசம் அளித்துள்ளோம். அவர்கள் என் வழக்கறிஞரைத் தொடர்பு கொள்ள வேண்டும்; இல்லையெனில் நீதிமன்ற நடவடிக்கையைத் தொடர்வோம்," என்று மாநில நிர்வாகக் குழுக் கூட்டத்திற்குப் பின் அவர் கூறினார்.

தமது உரையின் உண்மையான கருத்தை சிலர் மிகைப்படுத்தி, குறிப்பிட்ட நலன்களுக்காகத் திரித்ததாகக் கூறப்படுவதால் இந்த நடவடிக்கை எடுக்கப்படுவதாக சானுசி கூறினார்.

இவ்விவகாரம் தொடர்பாக அலோர் ஸ்டாரில் நெகிரி செம்பிலான் மற்றும் கெடா காவல்துறைப் பிரிவுகளுக்கு வாக்குமூலம் அளித்து முடித்துவிட்டதாகவும் அவர் தெரிவித்தார்.

"அனைத்தும் தெளிவாகவும் உண்மைகளின் அடிப்படையிலும் உள்ளன. மறைக்க எதுவும் இல்லாததால் நடைமுறை குறுகியதாக இருந்தது," என்றார்.

இதற்கு முன், சானுசி தமது வழக்கறிஞர் மொஹ்ட் ஃபைஸி சே அபு மூலம், அவதூறு குற்றச்சாட்டு தொடர்பாக சிலாங்கூர் பிகேஆர் தேர்தல் இயக்குநர் டாக்டர் என். சத்யா பிரகாஷுக்கு சட்ட நோட்டீஸ் அனுப்பியிருந்தார்.

கடந்த மாதம் நடந்த ஒரு உரையில், "மலாய்க்காரர்களுக்கு இந்த தானா மெலாயு மட்டுமே உள்ளது. இந்தியர்களுக்கு இந்தியா, சீனர்களுக்கு சீனா, கம்போடியர்களுக்கு கம்போடியா, சயாமியர்களுக்கு தாய்லாந்து. மலாய்க்காரர்கள் எங்கே? இங்கே மட்டுமே," என அவர் கூறியதாகச் செய்திகள் வெளியாகின. (மலாய் மொழியிலிருந்து மொழிபெயர்க்கப்பட்டது.)

எனினும், சீன மற்றும் இந்திய வம்சாவளி மலேசியர்களின் குடியுரிமை அல்லது உரிமைகளை கேள்விக்குள்ளாக்கும் நோக்கம் அக்கருத்துக்கு இல்லை என சானுசி மறுத்தார்.