நிலுவையிலுள்ள MA63 விவகாரங்கள் டிசம்பருக்குள் தீர்க்கப்பட வேண்டும்: சரவாக்

புத்ராஜெயா – நிலுவையில் உள்ள 1963 மலேசிய ஒப்பந்தம் (MA63) தொடர்பான அனைத்து விவகாரங்களும் டிசம்பருக்குள் தீர்க்கப்பட வேண்டும் என சரவாக் மாநில அரசு விரும்புவதாக துணை பிரதமர் டக்ளஸ் உகா எம்பாஸ் தெரிவித்தார்.

ஓர் அறிக்கையின்படி, MA63-ஐ முழுமையாக அமல்படுத்துவது குறித்த பேச்சுவார்த்தை கிட்டத்தட்ட பத்தாண்டுகளாக நடைபெற்று வருவதால், நிலுவைப் பிரச்சினைகளைத் தீர்ப்பதை விரைவுபடுத்துவது மிக முக்கியம் என அவர் கூறினார்.

இந்த ஆண்டின் இரண்டாவது MA63 அமலாக்க நடவடிக்கை மன்றக் கூட்டத்தில் அவர் இவ்வாறு பேசினார். நேற்று நடந்த இக்கூட்டத்திற்கு சபா மற்றும் சரவாக் விவகார அமைச்சர் முஸ்தபா சக்முட் தலைமை தாங்கினார். அவர் மன்றத்தின் தொழில்நுட்பக் குழுவின் துணைத் தலைவர் ஆவார்.

புத்ராஜெயாவில் நடந்த கூட்டத்தில் சபா, சரவாக் அரசுகளின் பிரதிநிதிகள், அத்துடன் துணை பிரதமர்கள் அவாங் தெங்கா அலி ஹசன் மற்றும் டாக்டர் சிம் குய் ஹியான் ஆகியோர் கலந்துகொண்டனர்.

பிரதமர் துறையின் சபா, சரவாக் விவகாரப் பிரிவு, 13 விவகாரங்கள் முழுமையாகத் தீர்க்கப்பட்டுள்ளதாகவும், ஐந்து இடைக்கால அடிப்படையில் தீர்க்கப்பட்டுள்ளதாகவும், கொள்கை முடிவுகள் எடுக்கப்பட்டிருந்தும் இரண்டு தீர்க்கப்படாமல் உள்ளதாகவும் தெரிவித்தது.

நான்கு விவகாரங்கள் இன்னும் விவாதத்தில் உள்ளன; ஐந்து புத்ராஜெயாவின் "உயர்மட்டத்திற்கு" பரிசீலனைக்கு அனுப்பப்பட்டுள்ளன.

ஏற்கெனவே தீர்க்கப்பட்ட முக்கிய விவகாரங்களில் சபா எலெக்ட்ரிசிட்டி எஸ்டிஎன் பிஎச்டி நிறுவனத்தை சபா அரசிடம் ஒப்படைத்தது அடங்கும். கிழக்கு மலேசியாவில் நாடாளுமன்ற இடங்களை அதிகரிப்பது, இந்தோனேசியாவின் கலிமந்தான் எல்லைப் பகுதி வளர்ச்சி ஆகியவை இன்னும் பேச்சுவார்த்தையில் உள்ளன.

நேற்று விவாதிக்கப்பட்ட முக்கிய விவகாரங்களில் கலிமந்தான் எல்லை வளர்ச்சி, மாநில அரசு ஊழியர்களை அதிகரிப்பது, கூட்டரசு சேவையின் போர்னியோமயமாக்கல், சுகாதாரம் மற்றும் கல்வி சார்ந்த விவகாரங்கள் இடம்பெற்றதாக உகா கூறினார்.

நிலுவை MA63 விவகாரங்களைத் தீர்ப்பதற்கு முன்னுரிமை அளிக்குமாறு அனைத்து கூட்டரசு அமைச்சுகளுக்கும் நிறுவனங்களுக்கும் முஸ்தபா உத்தரவிட்டதாக அவர் தெரிவித்தார்.

"கூட்டாட்சி உணர்வுக்கு இணங்க, சபா மற்றும் சரவாக் மக்களின் உரிமைகளையும் நலன்களையும் பாதுகாத்து, MA63 முழுமையாக அமல்படுத்தப்படுவதை உறுதி செய்ய கூட்டரசு மற்றும் சபா அரசுகளுடன் இணைந்து பணியாற்ற சரவாக் அரசு உறுதியாக உள்ளது," என்றார்.